Манојил (Мане) Јаковлески
90 години од раѓањето на Драган Богдановски
Пред 90 години, на 18 септември 1929 година во кумановското село Клечовце беше роден Драган Богдановски, еден од најпознатите македонски политички емигранти по Втората светска војна, идеолог и еден од оснивачите на партијата ВМРО ДПМНЕ.
За време на својот живот 30 години бил во челните редови на патриотската македонска дијаспора. Поради своите активности за исполнување на аманетот на претците на македонскиот народ, создавање на обединета и суверена македонска држава, тој бил повеќе години во затвор.
Воспитан во семејство со патриотски корени, во кое неговиот дедо бил илинденец, комита во четата на Атанас Бабата, Богоевски за време на своите студии на факултетот земјоделство и шумарство во Белград, се појавува како иницијатор за формирање на „Македонски студентски клуб“. Поради овој чин тој за првпат ќе ги почуствува затворските келии. Четири месеци бил затворен во лошиот на глас затвор на Обилиќев венец, а по излегувањето од таму бил исклучен од факултетот и без право да се запише на било кој друг факултет во тогашна Југославија.
Ваквата постапка на тогашните власти ќе го натераат Богдановски во 1950 година илегално да ја помине границата и да замине прво за Јужна Америка (Аргентина и Бразил), а потоа во 1954 година за Европа. Студира во Париз на Сорбона на Факултетот за политички науки и новинарство, за да веднаш започне со политичко дејствување. Тој ја формира организацијата „Македонски национален фронт“ и го издава весникот „Македонска искра“, кој под притисок на јужниот сосед набргу згаснал.
Во 1958 година се жени и заминува да живее во Норвешка, каде продолжува со своите политички активности. Оспособува кирилична печатница и се јавува како иницијатор за издавање на весници, списанија и книги за Македонија. Тој го издава списанието „Македонска лоза” и „Слободна Македонија”, потоа го печати весникот „Македонија”, списанието „Македонска нација” и т.н. Ваквото дејствување на Богдановски му смета на тогашните југословенски власти и агенти на СДБ го киднапираат и од Париз го носат во Југославија.
По влегувањето во Југославија, преку Љубљана и Скопје, Богдановски е донесен во објект на полицијата во близина на Македонски Брод, каде што е под истрага година и пол. Потоа е воден судски процес зад затворени врати на кој Богдановски е осуден на 13 години затвор. Помилуван е во 1988 година.
По излегувањето од затвор го прифаќа неговиот пријател Мане Јаковлевски кој со пмош на својот брат му обезбедува стан за живеење во Скопје. Меѓутоа, по добивањето на патна исправа (пасош) Богдановски заминува за Шведска каде ја подготвува програмата за формирање на национална политичка партија. Свесен за поделеноста во македонското општество, тој бара да се збијат редовите на Македонците во новата партија под името „Демократска партија на македонско национално единство“ или ДПМНЕ
Во 1990 година во Минхен Драган Богдановски и Гојко Јаковлевски од Берлин, носат одлука за формирање на партијата и истата да носи предзнак ВМРО. Иако на состанок се присутни Љупчо Георгиевски, Борис Змејковски и Владо Транталовски од Ресен, главен идолог и основач на партијата која се потоа се регистрира во Македонија, не е никој друг, туку е Драган Богдановски.
Поради неговите заслуги, на првиот конгрес на ВМРО ДПМНЕ, кој е оддржан на 6 и 7 април 1991 година во Прилеп, Богдановски е избран за почесен претседател на партијата, а од 1991 до 1993 година е претседател на Задграничниот комитет на ВМРО ДПМНЕ за Европа. Меѓутоа, набргу доаѓа до заладување на односите со актуелниот претседател на партијата Љупчо Георгиевски и до конечно разделување со партијата. Во мај истата година Богдановски се обидува наново да ги збие разединетите Македонци и формира нова партија Македонски национален фронт, но таа не заживува, по што Богдановски се враќа во Шведска.
И денес постојат обиди да се дискредитира Драган Богдановски и некои други личности да се наметнат за идеолози и оснивачи на партијата. Меѓутоа, неспорна е улогата на Богдановски во формирањето на ВМРО ДШМНЕ, за што жив сведок сум Јас Мане Јаковлевски.
Драган Богдановски умира на 31 мај 1998 година. Починал во воз во Данска додека бил на пат за Шведска. Но, поради спорот со Георгиевски на погребот присуствува само еден член на партијата.
Денес кога би бил жив, Драган Богдановски би имал 90 години. Тој сигурно никогаш не би се сложил со промена на уставното име на државата, како и со низа договори на актуелната власт предводена од Социјалдемократите.
По повод 90 години од раѓањето на Драган Богдановски редно е да се потсетиме на неговите заложби за создавање на слободна и суверена македонска држава, како и на неговата борба за зачувување на името, традицијата и културата на македонскиот народ. Само така можеме да ја спасиме татковината и младите да ги вратиме на вековните огништа.
