Душан Ристевски-Македон
Мое видување: ЗОШТО СЕ БОЈКОТИРА ДУШАТА НА МАКЕДОНИЈА
Да бидам искрен ме запрепасти кога слушнав дека некои луѓе, а и организации од македонската заедница во Австралија го бојкотирале доаѓањето на Танец во Австралија. Човек да не знае како да реагира, што да каже или да препорача, ама вистина, не треба да се молчи на некои „нетокму“ работи. Народецот би рекол, за овие луѓе, „не можат по магарето па сега удри по самарот“.
Доколку на некој му смета доаѓањето на Танец тогаш не мора да оди на концертот да го гледа, а обидот целата турнеја да се политизира, вистина е многу невкусно, наивно и глупаво. Аргументот е во тоа што ансамблот си го промена името, како и сите други установи или институции кои се под некаква владина контрола или тортура.
Само да се потсетиме дека министерот за (не)култура, кој е од албанско потекло, се обиде да го уништи Танец со недоделување на парични средства во корист на некое селско албанско друштво, само за да се уништи нашиот Macedonian jewel кој постои 70 години. И сега некои од Дијаспората сакаат да помогнат во ова уништување!? Каква бедност.
Народот не е крив, во случајот членовите на Танец, што им се наметнува „северен сечко“ од психопатот Заев и неговите платеници. Народот на референдумот убаво си го кажа мислењето но кој го слуша народот – Европа се слуша, еврото и митото се важни, а народот се смета како некоја стока. Исто како кога Македонија беше под јаремот на турското робство, кога рајата (Македонците) беа продавани за помалку пари од говедата.
Тие што бојкотираат убаво би било да се погледнат себе си: кои се и во што веруваат? Веруваат во промовирање на македонската култура и нација или во своите мизерни размислувања!? За да се бојкотира владата на Република Македонија и на сите оние кои се дел од таа гарнитура – тоа ДА. И треба да настојуваме на секој можен демократски начин да спречуваме доаѓање на политичари од Македонија кои ќе шират раздор меѓу дијаспората. Но ова е Танец, а Танец е душата на Македонија, а Македонија не се бојкотира, таа се негува, вдахнува со љубов и промовира. Не треба да ја понижуваме Македонија (бидејќи и самите се понижуваме) и да гледаме постојано таа што ни дава (таа е нашата мајка и се знае што ни даде па не треба да прашуваме) туку треба да гледаме ние што ѝ даваме на Македонија. Во тоа е големината и свесноста наша.
Турнејата треба да се поддржи, концертите треба да се посетат и да им се покаже на нашите негатори дека Македонија е цела единствена во срцата на Македонците. Да им се покаже на предавничката влада на Република Македонија дека ние никогаш нема да бидеме нешто друго освен МАКЕДОНЦИ!.
