РИСТО ПАРГОВ (1942-2020)
24 јануари 2020 година, Битола, Македонија – Вчера на 78 години возраст во Битола почина Ристо Паргов, човек кој целиот свој живот го посвети на македонската кауза.
Ристо Паргов е роден на 14 јули 1942 година во мариовското село Полчиште. Основно училиште завршил во Битола, каде живеел во Јени Маале. Млад емигрирал во Белгија. Во Белгија активно се вклучува во македонската политичка емиграција и меѓу Македонците во Европа.
Во 1957 година во Брисел го основа Македонското здружение “Тодор Александров“. Некое време бил член и на МПО. Дал голем придонес во работата на повеќе здруженија на Македонците низ Европа и светот. Бил претседател и на задграничниот комитет на ВМРО-ДПМНЕ во Белгија, а придонел и во формирањето на ВМРО-ДПМНЕ во деведесеттите години на минатиот век.
Ќе се памети како македонски патриот, дисидент, револуционер и идеолог на ВМРО, посветен на борбата за независна и обединета Македонија! Бил член на тајни групи на ВМРО за време на Југословенската федерација и затворан од УДБ. Одлежал некое време затвор и во Грција, поради македонските работи.
Познат е како донатор и иницијатор за формирање на првите македонски цркви во Европа, основач бил на повеќе спортски клубови.
Остварил средби со низа странски и македонски политичари за реализација на идејата за суверена и самостојна Македонска држава. Голем број Македонци во Македонија и Европа го паметат и како голем хуманитарец.
Последните десетина години Ристо Паргов како пензионер живееше во Битола. Поради неговиот живот и дело посветени на борбата за Македонија, прогласен е за почесен член на Македонското здружение “Тодор Александров“ во Битола.
Неговото тело ќе биде изложено утре (сабота) 25 јануари од 11.00-13.00 часот во капелата на македонската православна црква “Света Недела” во Битола. Опелото и погребот ќе се извршат на Светонеделските гробишта во 13.00 часот.
Вечна му слава и Бог да го прости, нека Господ Бог ја насели неговата душа меѓу праведниците во царството небесно. Амин!
СМК
