Македонска Нација
Млади стрип-автори од Македонија, Албанија и Србија преку своите дела испратија пораки за мир, соживот и заштита на природата.
Под мотото „Уметност што обединува, порака што инспирира“, во НУ Центар за култура „АСНОМ“ во Гостивар свечено беше отворена групната изложба на млади стрип-автори од Македонија, Албанија и Србија. Настанот, кој привлече бројни љубители на уметноста, е реализиран со поддршка на Министерството за култура и туризам.
Во време на бројни регионални предизвици и општествени поделби, изложбата покажа дека деветтата уметност може да биде моќен медиум за поврзување на луѓето и градење мостови на разбирање. Преку своите дела, младите автори испратија силни пораки за мир, соживот и заштита на природата, актуелизирајќи ги универзалните вредности на толеранцијата и заедништвото.
Пред присутните се обрати Томе Трајков, раководител на групацијата и иницијатор на голем дел од претставените проекти. Посетителите имаа можност да разгледаат стрип-дела создадени во рамките на активностите на Стрип центарот на Македонија (СЦМ), како и творби реализирани во други регионални проекти под негово менторство.
Изложбата претставува една од првите активности на новоформираната групација „Стрип центар – Стрипот може“ со седиште во Велес, која функционира како програмска фракција на Стрип центарот на Македонија. Основната цел на оваа иницијатива е континуиран развој, промоција и афирмација на македонскиот стрип меѓу сите етнички заедници во државата и пошироко во регионот.
„Создаден е процес и нема запирање“, порачуваат организаторите, најавувајќи нови активности и проекти насочени кон поддршка на младите автори и развојот на стрип-културата.
Изложбата во Гостивар ќе биде отворена за посетители во наредните седум дена.
