Страхил Андреев

  Страхил Андреев

Страхил Андреев (19. III 1910 – 1989) е македонски боксер, основоположник на боксот во Македонија. Меѓу двете светски војни, од 1924 година бил на печалба во Египет каде почнал да се занимавал со бокс. Во периодот од 1930 до 1933 година бил трикратен државен првак во бокс. За Репрезентацијата на Египет боксувал против Алжир, Тунис, Либија и Грција. Од 30 професионални борби имал 24 победи, 4 нерешени и 3 порази. Во 1946 година се вратил во Македонија и бил организатор и тренер на неколку скопски клубови и на Македонската репрезентација.

Страхил Андреев е роден на 19 март 1910 година во Скопје, во скопското Пајко Маало. Неговит татко Коста имал бакал, но поради економската криза, во 1924 година заминал на печалба во Египет.

Во 1927 година Андреев почнал активно да се занимава со бокс. Тој се зачленил во боксерскиот клуб „Олимпик“ во Александрија и брзо напредувал. Како аматер имал околу 80 мечеви на кој прикажал убав стил и одлична техника. По само три години занимавање со бокс станал аматерски првак во бокс во Египет.

Во периодот од 1930 до 1933 година Страхил Андреев бил трикратен државен првак на Египет во велтер категорија. Тој боксувал за Репрезентацијата на Египет против Алжир, Тунис, Либија и Грција.

Поради своите успеси во аматерскиот бокс, во 1933 година Страхил станал професионален боксер. Добил лиценца под името „Стратис Андреевиќ“ и имал 30 професионални борби, од кои 24 победи, 4 нерешени и 3 порази.

По Втората светска војна се вратил во татковината. Во 1946 година Страхил се вратил во Македонија и продолжил да живее со боксот. Тој бил организатор и тренер на неколку скопски клубови и на Македонската репрезентација. На негова иницијатива биле основани првите боксерски клубови „Победа“ и „Вардар“, а како тренер создал многу врвни македонски боксери, кои подоцна станале истакнати тренери и судии. 

За успешниот развој на боксот во Македонија и Југославија Страхи добил многубројни признанија, како и ордените: „Орден на трудот од трет ред“ (1959) и „Орден за заслуги за народ со сребрена ѕвезда“ (1961).

Страхил Андреевски починал во 1989 година во Скопје.