Тихомир Каранфилов
Георги Радулов (29. IX 1942 – 14 VI 2025) e македонски културно-национален деец, борeц за македонската кауза во Бугарија. Бил соосновач и заменик-претседател на Друштвото за бугарско-македонско пријателство и со години тој ја проучувал историјата на својот македонски народ. Дипломирал на два технички факултети и бил редовен професор на Електро-машинскиот факултет при Рударско-геолошкиот универзитет „Свети Јован Рилски” во Софија, каде што од 2001 до 2005 година бил и негов декан.
Проф. д-р Георги Радулов – Радуле е роден на 29 септември 1942 година во селото Кремен, Неврокопско, Пиринска Македонија. По завршувањето на основното училиште во родното село и средното образование во Банско, дипломирал на два технички факултети: на Електро-машинскиот факултет при Рударско-геолошкиот универзитет и на Транспортниот факултет при Техничкиот универзитет во Софија. Бил редовен професор на Електро-машинскиот факултет при Рударско-геолошкиот универзитет „Свети Јован Рилски” во Софија по предметот „Автоматизација на рударството”, каде што од 2001 до 2005 година бил и негов декан. Има објавено неколку учебници за техничките училишта.
Независно од неговата професија, Радулов бил општествено ангажиран. Бил соосновач и заменик-претседател на Друштвото за бугарско-македонско пријателство и со години тој ја проучувал историјата на својот македонски народ. Како резултат на неговата работа во 1997 година во Софија е објавена книгата “Историја на Македонија – апологија на македонизмот“.
Оваа книга ја претставува историјата на македонскиот народ, од антиката до средината на XX век, и таа е првата книга од ваков вид објавена во Бугарија и на бугарски јазик. Поради искажаните ставови за одбрана на засебниот македонски национален идентитет, авторот и книгата предизвикаа бурни реакции во Бугарија, и беа цел на бројни критики и притисоци.
Од книгите на историска тема тој ги има објавено уште: „Кремен – минато и наследство“ и „Кој ја фалсификува историјата?“. Книгата „Кој ја фалсификува историјата” била одговор на антимакедонскиот памфлет „Десетте лаги на македонизмот” на бугарскиот историчар Божидар Димитров. Во ова дело проф.д-р Георге Радулов Радуле научно и аргументирано ја брани псоебноста на македонскиот народ, јазик, култура и историја.
За неговите истражувачко-публицистички заслуги тој е носител на високото признание Духовен воин на Македонските духовни конаци (за 2007 г.) во Струга.
Георги Радулов починал на 14 јуни 2025 година.
