Тихомир Каранфилов
Илија Милчин (19. VI 1918 – 11. III 2002) е македонски драмски, телевизиски и филмски актер, режисер, преведувач и публицист. Тој е еден од основачите на Македонскиот народен театар (МНТ), уметнички раководител и режисер на Обласниот МНТ во Горна Џумаја (Благоевград, Бугарија), за време на Културната автономија на Пиринска Македонија. Тој е еден од најголемите македонски актери.
Илија Милчин е роден на 19 јуни 1918 година во Прилеп. Дипломирал на Правниот факултет во Софија во 1942 година, а потоа на Музичката академија во Белград три години студирал на одделот за театрологија. Пред почетокот на Втората светска војна, во Прилеп формирал аматерска театарска група, чиишто членови кон крајот на војната се приклучиле кон Културно-уметничката група „Кочо Рацин“ во Горно Врановци во 1944 година.
Во 1944 година се вработил во Македонскиот народен театар во Скопјe. Во периодот од 1944 до 1947 година работел како драматург, а потоа како уметник и режисер во МНТ. Во текот на 1947 и 1948 година бил театарски директор и режисер на Обласниот македонски театар во Горна Џумаја, за време на Културна автономија на Пиринска Македонија.
Во периодот од 1964 до 1969 година бил драмски директор на Македонскиот народен театар во Скопјe, како и професор на Факултетот за драмски уметности во Скопје, а од 1969 до 1973 година, работел како хонорарен професор на одделот за актери при Високата музичка школа во Белград. По враќањето во Скопје повторно работел во Македонскиот народен театар, сè до 1983 година, кога се пензионирал.
Илија Милчин успешно работел како режисер, драматург и преведувач на драмски текстови. Тој преведувал дела од руски, хрватски, бугарски и француски автори.
Периодично бил член на Уметничкиот совет на „Вардар филм“, а првпат на филм се појавил како актер во Мис Стон (1958), а потоа имал бројни успешни актерски остварувања. Улоги: Јаго („Отело„“); Губернаторот („Смртта на Губернаторот“); Леоне („Господа Глембаеви“); Галиело („Галилео Галилеј“); Жак („Како што милувате“); Крижавец („Во агонија“);Тефик-бег („Гоце“) и др. Режии: „Длабоки корени“, „Црнила“; „Антигона“; „Три сестри“; „Малограѓани“; „Стаклена менажерија“; „Ученик на ѓаволот“; „На дното“; „Печалбари„“ и др. Филмски улоги во филмовите: „Јазол“; „Мис Стон“; „Мирно лето“; „Исправисе Делфина“ и др..
Илија Милчин е добитник на повеќе награди меѓу кои: „11 Октомври“, „Кирил Пејчиновиќ“, „Јован Стерија Поповиќ“, „13 Ноември“, „Војдан Чернодрински“ и др. Тој е почесен член на Друштвото на писатели на Македонија. Негов син е режисерот Владимир Милчин.
Илија Милчин починал на 11 март 2002 година во Скопје.
