Министерството за транспорт преку соопштение реагира на обвинувањата на СДСМ поврзани со поништената постапка за набавка на 150 електрични автобуси, оценувајќи дека станува збор за „невистини, манипулации и политичка паника“.
Од Министерството посочуваат дека, како што велат, очајот во СДСМ по објавувањето на фотографијата со Рубин Земон и Виктор Стојанов довел до нов бран, како што наведуваат, лажни конструкции и обиди за дефокусирање на јавноста.
„Фотографијата во која наводно ‘откриле’ нешто е тежок фалсификат и глупост. Во документот што самите си го подготвиле во нивниот ‘центар за лаги’, стои дека лицето кое ја поднело жалбата ќе ја информира ‘Белата куќа и МНР на САД’. Такво министерство не постои, туку постои Стејт департмент“, се наведува во реакцијата.
Во соопштението се додава дека не ги изненадува, како што велат, „непромислената прес-конференција на СДСМ“, посочувајќи дека партијата се обидува да го прикрие сопствениот политички срам.
Министерството потенцира дека постапката за набавка на 150 електрични автобуси и полначи била водена транспарентно и целосно согласно Законот за јавни набавки.
Според информациите што ги објавуваат, на тендерот пристигнале четири понуди:
- Кинеската компанија „Актрус“ со автобуси „Кинг Лонг“ – 50,7 милиони евра без ДДВ
- Унгарско-австрискиот конзорциум „Електробус Икарус – ЕВН“ – 50,6 милиони евра без ДДВ
- Кинеската компанија „Жонг Тонг“ – 50,6 милиони евра без ДДВ
- Турската компанија „БМЦ“ – 59,2 милиони евра без ДДВ
Од Министерството објавија и поединечни цени по автобус без полнач:
- „Електробус/Икарус“ – 314.000 евра
- „Актрус/Кинг Лонг“ – 324.000 евра
- „Жонг Тонг“ – 327.000 евра
- „БМЦ“ – 385.000 евра
„Од овие бројки јасно се гледа дека нема разлика од 12 милиони евра, како што тврди СДСМ“, наведуваат од Министерството и бараат јавно извинување од опозициската партија, најавувајќи и тужба за клевета доколку тоа не се случи.
Во реакцијата дополнително се објаснува дека трите компании не ги исполниле условите за избор.
Компанијата „Актрус/Кинг Лонг“ не доставила валидна банкарска гаранција, „Жонг Тонг“ исто така имала невалидна банкарска гаранција, додека „БМЦ“ не доставила банкарска гаранција и не ги исполнила техничките услови.
За конзорциумот „Електробус Икарус – ЕВН“, како што информираат од Министерството, второстепената комисија за жалби по јавни набавки утврдила дека документот за соработка меѓу Икарус и ЕВН бил хартиено потпишан, но не и електронски, поради што тендерот бил поништен.
Од Министерството поставуваат и прашање зошто СДСМ, според нив, „излегува во одбрана на кинеска компанија“, посочувајќи дека дописот што го покажувала опозициската партија бил токму од „Актрус/Кинг Лонг“, чија понуда била невалидна.
„Дали СДСМ одработува за странски интереси и зошто? Или мотивот е локален и се крие зад локални пробисвети и криминалци? Тоа се прашања за СДСМ“, се наведува во соопштението.
