Изгледа дека во СДС не можат да издржат ниту еден ден без да се стават во улога на најгласен адвокат на официјална Софија.
Наместо да ја поздрават иницијативата на германскиот канцелар Фридрих Мерц и францускиот претседател Емануел Макрон за нов пристап кон проширувањето на Европската Унија, од СДС побрзаа да ја релативизираат и да ја сведат на старата приказна за безусловно прифаќање на сите бугарски барања.
Самитот во Тиват донесе сосема поинаква порака. Франција и Германија јасно предложија постепена интеграција на земјите кандидати во европските институции и на единствениот европски пазар врз основа на заслуги, реформи и реален напредок. Тоа е нов пристап кој отвора можности за државите од Западен Балкан уште пред полноправното членство.
Но, наместо да ја искористат оваа нова европска динамика за зајакнување на македонските позиции, од СДС повторно ја повторуваат истата реторика која со години ја туркаа – дека Македонија треба безусловно да прифаќа сè што ќе биде побарано од неа.
Особено загрижува што СДС како аргумент ги користи изјавите на бугарскиот претседател Румен Радев, практично претставувајќи ги како конечна вистина за европскиот пат на Македонија. Наместо да ги бранат македонските позиции, тие повторно се повикуваат на ставовите на политичари кои отворено ги оспоруваат македонскиот идентитет, историја и јазик.
Граѓаните добро паметат дека токму политиките на СДС доведоа до прифаќање на францускиот предлог без конкретни гаранции и создадоа простор Бугарија постојано да отвора нови услови и барања.
Денес, кога во Европа се отвораат можности за нов пристап и нова динамика, СДС повторно се обидува да ја врати Македонија на политиката на отстапки и капитулации.
Македонија има право да бара европска интеграција врз основа на принципи, достоинство и заемна почит. Тоа не е антиевропска политика, туку политика на самопочит и заштита на националните интереси.
Очигледно е дека СДС не може да се помири со фактот дека Македонија денес настапува поодлучно и со повеќе самодоверба на меѓународната сцена. Затоа, наместо да се радуваат на секој дипломатски успех на државата, тие продолжуваат да бараат причини за критика и да ја поддржуваат секоја позиција што доаѓа однадвор, дури и кога е спротивна на македонските интереси.
Тиват уште еднаш покажа дека Европа размислува за нови решенија. За жал, СДС повторно покажа дека останува заробеник на старите политики на попуштање и прифаќање на туѓи агенди.
