На одбележувањето на 36-годишнината од основањето на ВМРО-ДПМНЕ, што вечерва се одржува во Струмица под мотото „Македонија забрзува, наша обврска“, членот на Извршниот комитет на ВМРО-ДПМНЕ, Дафина Стојаноска, порача дека партијата останува доследна на идеалите со кои е формирана пред повеќе од три децении и продолжува да се залага за развој на демократските вредности во самостојна и независна Македонија.
Во изјава за Алфа телевизија, Стојаноска истакна дека иако денешните околности носат нови предизвици, ВМРО-ДПМНЕ не отстапува од своите темелни определби и визија за иднината на државата.
„Денес се соочуваме со нови предизвици, но секако дека не забораваме како започнавме, кои беа идеалите и секако дека со нив треба да ја газиме и иднината. Европскиот пат е зацртан и во статутот на нашата партија, од нејзиното формирање до денес. Европските реформи што од нас се бараат треба да се спроведат, но истовремено мора да ја кажуваме вистината за Македонија и за неправдата што Бугарија сака да ни ја наметне, а која, за жал, беше прифатена од СДС и ДУИ додека ја предводеа Владата“, изјави Стојаноска.
Таа нагласи дека ВМРО-ДПМНЕ има јасен и непроменет став кога станува збор за европската интеграција на државата и дека без поддршката на пратениците на ВМРО-ДПМНЕ не можат да се реализираат нови уставни измени.
„Ние секогаш и секаде го кажуваме нашиот став и нема промена на нашиот став, бидејќи сите се свесни дека без пратениците на ВМРО-ДПМНЕ, во која било комбинација во Парламентот, не може да се случат повторни уставни измени. Нашиот став е јасен – уставни измени со гаранции дека вметнувањето на Бугарите во Уставот ќе биде конечно и последно барање од страна на Бугарија, а не прв чекор по кој повторно ќе се отвори бескраен процес на нови условувања на патот кон Европската Унија“, истакна Стојаноска.
Според неа, Македонија останува цврсто определена за членство во Европската Унија, но процесот мора да се темели на почитување на националното достоинство, државните интереси и јасни гаранции дека европската перспектива нема да биде предмет на нови билатерални условувања.
