Македонска Нација
ВМРО-ДПМНЕ обвинува дека СДСМ и лидерот Венко Филипче продолжуваат со политики кои, според партијата, се насочени кон поткопување на македонскиот национален идентитет и државните интереси. Од партијата велат дека процесот започнал за време на владеењето на Зоран Заев, а сега, како што наведуваат, Филипче е подготвен „да го доврши бришењето на сè што е македонско“.
Според соопштението, СДСМ бесрамно тврди дека ги заштитиле идентитетот и историјата, додека во пракса ги менувале имињата на институциите, па така „Македонска опера и балет“ станала „Национална опера и балет“. Од ВМРО-ДПМНЕ посочуваат и дека бил вршен притисок врз Фудбалската федерација на Македонија да го промени своето име.
Партијата реагира и на, како што велат, „релативизирањето на македонската историја“, посочувајќи дека биле поставувани табли пред споменици на македонски историски личности со кои тие се претставувале како дел од „хеленската“, односно старогрчката историја.
Во соопштението се наведува дека терминот „промакедонски“ е сосема легитимен и означува застапување на македонските национални и државни интереси, а СДСМ и Венко Филипче, според ВМРО-ДПМНЕ, немаат проблем со користењето на терминот „северномакедонци“ и не реагираат на негирањето на македонскиот идентитет од страна на Бугарија.
Од партијата додаваат дека вистинскиот проблем не се Бугарите во Уставот, туку, како што тврдат, постојаните барања за отстапки од македонскиот идентитет, јазик и историја. Според ВМРО-ДПМНЕ, Венко Филипче ги застапува истите позиции како официјална Софија.
Во вториот дел од соопштението, ВМРО-ДПМНЕ остро реагира на одлуката на ЈО ГОКК да ја запре постапката за случајот со набавката на мазут за ТЕЦ Неготино, тежок 167 милиони евра. Од партијата го обвинуваат шефот на ЈО ГОКК, Ислам Абази, дека ја ставил правдата во служба на СДСМ и ДУИ и дека со затворањето на случајот ги заштитил Васко Ковачевски, Асмир Јахоски и нивните соработници.
Според ВМРО-ДПМНЕ, ова е преседан во македонското правосудство – случај од висок јавен интерес и тежок милионски криминал да биде затворен уште пред да стигне до судска постапка. Од партијата тврдат дека одлуката е политички мотивирана и претставува доказ за влијанието што, како што велат, сè уште го имаат Зоран Заев, Али Ахмети и Венко Филипче врз делови од обвинителството и судството.
ВМРО-ДПМНЕ го повика Ислам Абази да поднесе оставка, оценувајќи дека со ваквите постапки се урива довербата во правосудниот систем и се создава чувство на неказнивост за висока корупција и организиран криминал.