Македонска нација
Преговорите за идната влада меѓу коалицијата предводена од ВМРО ДПМНЕ и коалицијата на опозиските албански партии „Вреди“, како и со Движењето ЗНАМ, се во напредна фаза. Се очекува новата влада да биде формирана до 20 јуни. Пред оваа нова Влада ќе престојат тешки задачи на внатрешен и надворешен план: надминување на хаосот кој го оставија СДС и ДУИ во текот на седумгодишното владеење со земјата, како и надминување на пречките кои ги поставуваат Грција и Бугарија на патот на Македонија кон ЕУ.
За да се справи со хаосот кој СДС и ДУИ го оставија дома, како и за да се надминат пречките за влез во ЕУ, новата влада ќе треба да се фокусира на Копенхашките критериуми. – правила кои дефинираат кои земји се подобни да се приклучат на Европската унија.
Во 1993 година, Европскиот совет усвои три главни критериуми што земјите кандидати мора да ги исполнат доколку сакаат да станат членки:
Политички критериум – стабилност на институциите кои обезбедуваат демократија, владеење на правото, почитување на човековите права и правата на малцинствата и прифаќање на политичките цели на ЕУ;
Економски критериум – постоење на ефективна пазарна економија и способност на пазарните фактори да се справат со конкурентските притисоци и пазарните закони во рамките на ЕУ; и
Правен критериум – усвојување на целокупното стекнато право на ЕУ.
Покрај овие три критериуми, секоја земја која сака да стане полноправна членка на ЕУ мора да го исполни и четвртиот, административен критериум (критериум Мадрид), кој бара прилагодување на соодветни административни структури со цел да се обезбедат услови за постепено и хармонична интеграција.
Со исполнувањето на овие критериуми, реформи во сите области, пред се ќе се надминат домашните катастрофални состојби кои зад себе ги оставаат ДУИ и СДС, а со тоа ќе се олесни и патот кон ЕУ – надминување на наметнатите билатерни прашања.
Во текот на седумгодишното владеење ДУИ и СДС, се фокусираа на надворешната политика, а ги запоставија реформите дома.
Водејќи поданичка политика го сменија името и ги загрозија националните интереси. Додека надвор тргуваа со името, идентитетот, јазикот и културата, дома овозможија огромен замав на корупцијата и криминалот. Така денес нема област, во која не е потребен ремонт. Сепак меѓу најважните задачи на новата власт за да се спречи корупцијата и криминалот во земјата ќе биде реформа на правосудниот систем.
Имено, реформскиот процес е исклучително важен пред се за нас самите, а потоа и за евроинтеграциите, Исполнувањето на Копенхашките критериуми се поважни и од мантрата на досегашната коалициона влада на ДУИ и СДС, дека ако се извршат уставни измени и Бугарите влезат во Уставот, Македонија ќе го започне пристапниот процес за влез во ЕУ.
Со променето име, иако на референдум не го одобри македонски народ, станавме членка на НАТО, но не и на ЕУ и покрај ветувањата. Тоа треба да биде опомена, дека дури и да се извршат уставните измени, никој на Македонија не и гарантира влез во ЕУ. Едноставно Грција и Бугарија не сакаат Македонија да биде равноправна со нив во Брисел и додека во ЕУ важат сегашните правила, Атина и Софија ќе се закануваат со вето.
Особено треба да се внимава сега, кога ЕУ се наоѓа на прекретница, да се биде или не.
Различните погледи кон воената интервенција на Москва во Украина, непочитување на деморатските вредности и човековите права од поедини членки на ЕУ, можат да ја загрозат европската идеја.
Пред претседателот на Македонија Гордана Силјановска Давкова и пред идниот премиер и лидер на ВМРО ДПМНЕ, Христијан Мицкоски претстојат тешки предизвици на внатрешен и надворешен план. Сепак главен фокус треба да бидат реформи во правосудскиот систем, заштита националните интереси, борба со корупцијата и криминалот, се со цел да донесат подобар живот на македонскиот народ и останатите заедници во земјава.
