Мане Јаковлески
Резултатот на последниве локални избори не се само политичка победа, тие се народна победа, победа на чесноста, на трудот и на обединета Македонија. Македонските граѓани уште еднаш покажаа дека никој не може да ја потцени неговата свест, мудрост и чувство за правда.
На последните локални избори, народот гласаше не со страв, туку со гордост. Со глава исправена и срце полно со љубов кон својата татковина, избра луѓе, а не партиски интереси, избра чест, работа и резултати, а не празни ветувања и лаги.
Секој глас даден за новите градоначалници е глас за новото лице на Македонија, држава што се буди, што се обновува, што повторно верува во себе. Од Скопје до Битола, од Куманово до Охрид, од Прилеп до Гевгелија, граѓаните испратија јасна порака: Доста беше со понижувања! Доста беше со поделби! Македонија има свој пат!
Таа порака е доверба кон човекот кој ја врати надежта во народот, Премиерот Христијан Мицкоски. Во само 15 месеци на чело на Владата на Република Македонија, Мицкоски направи повеќе отколку што други не направија за цели децении.
Под негово водство, економијата повторно дише, платите растат, пензиите се зголемени, се отвораат нови работни места. Владата покажа дека знае како да ја зајакне домашната економија, како да го поддржи земјоделецот, работникот и младите кои сакаат иднина во својата земја, а не билет во еден правец.
Во надворешната политика, Македонија повторно доби достоинство. Се брани името, идентитетот и честа на македонскиот народ. Денес, на меѓународната сцена, Македонија не е повеќе тивок слушател, туку држава што со гордост го кажува својот став, без потклекнување и без компромиси што ја навредуваат државата.
Во инфраструктурата, државата се менува пред очи. Се градат нови автопати, патишта и водоводи, канализации, се реконструираат училишта, детски градинки, болници, се привлекуваат нови странски инвестиции,… Македонија повторно станува градилиште на надежта.
Оваа влада не е влада на зборови, туку на дела. Се намалија долговите што со години ја гушеа државата, се воведе ред во јавните финансии, а државната каса конечно се полни од работа, а не од корупција. Владата покажа дека честното работење не е слабост, туку сила!
На овие избори се случи нешто уште поважно, заврши времето на поделби по национална основа. Македонци, Албанци, Турци, Власи, Роми, Срби, Бошњаци и сите останати, сите гласаа со ист глас и со ист сон: подобар живот во праведна, силна и обединета држава.
Тоа е резултат на новата политичка култура, изградена врз почит, партнерство и визија, што ја градат пред се’ раководството на ВЛЕН на чело со Изет Меџити и Претседателот на ВМРО-ДПМНЕ и премиер на РМ Христијан Мицкоски.
Тие покажаа дека кога има доверба и чесност, граѓаните во Македонија не се делат, туку се обединуваат. ВЛЕН и ВМРО-ДПМНЕ и останатите коалициони партии заедно покажаа дека иднината не припаѓа на поделбите, туку на соработката. Дека Македонија може да биде држава во која секој ќе се чувствува почитуван, и каде љубовта кон татковината не се мери по етничка припадност, туку со дела и чесност.
Овие избори се повеќе од победа. Тие се доказ дека Македонија конечно проработе како едно срце, со една мисла и една цел. Денес Македонија стои исправена, со премиер што не се продава, со народ што не заборава, и со иднина што се гради со пот, љубов и вера.
Оваа победа не е само политичка, таа е народна победа, победа на сите граѓани, без разлика на вера и нација, што веруваат во работа, во чесност и во Македонија што ќе остане на своето, горда, достоинствена и независна.
Македонските граѓани покажаа мудрост, избраа човек, избраа пат, избраа иднина, ја избра заедничка Македонија!
