Црна се чума зададе,
таму долу в Македонија,
таму долу, в Демир Капија.
Кој ќе се јунак избере
чумата да ја пропади?
Се избрал јунак, се нашол —
млад Делче, млади војвода.
Тој појде в Македонија
чумата да ја пропади.
Црн ми се облак зададе,
пак долу в Македонија,
таму долу, в Демир Капија.
Дали се црни облаци
или се Турци поганци?
Не ми се црни облаци,
не ми се Турци поганци,
туку ми се чета комити,
туку се војводи, четници.
Ранет ми јунак носеа,
ранет ми јунак — млад Делче,
млад Делче, млади војвода.
Делче дружина говори:
— Дружино верна, сговорна,
вие ќе утре идете
по мачната наша земја.
Кога ќе вие минете
низ мојот град Кукуша,
мајка ми ќе ве пречека,
за мене ќе се распраша:
„Каде е син ми, млад Делче?“
Вие ќе нејзе кажете:
„Млад Делче ми се посврши
за девојка Македонија,
за црната ропска земја!“
Македонска народна револуционерна песна посветена на Гоце Делчев и на борбата за слободата на Македонија.
