ВМРО-ДПМНЕ обвинува дека шефот на ОЈО ГОКК, Ислам Абази, донел контроверзна одлука за запирање на постапката поврзана со набавката на мазут за потребите на ТЕЦ Неготино, вредна 167 милиони евра.
Според партијата, одлуката е донесена во корист на, како што велат, „структурите на СДС и ДУИ“, а пратеникот Антонијо Милошоски посочи дека случајот не смее да биде затворен без целосно расчистување на сите сомнежи за криминал и злоупотреби.
Во реакцијата се наведува дека меѓу осомничените во предметот биле и поранешниот директор на ЕСМ, Васко Ковачевски, како и Асмир Јахоски и Ратко Капушевски.
Од ВМРО-ДПМНЕ тврдат дека јавноста видела сомнежи за перење пари, криминал и штета врз животната средина, додека Обвинителството оценило дека нема доволно докази за продолжување на постапката.
Партијата потсетува и на наодите на Државна комисија за спречување на корупцијата, според кои на фирмата РКМ ѝ биле исплатени повеќе средства за помалку испорачан мазут, односно дека недостасувале околу 18 илјади тони мазут.
ВМРО-ДПМНЕ поставува три прашања до обвинителот Абази:
- зошто постапката е запрена токму сега;
- врз основа на каква проценка е донесена одлуката;
- и дали биле сослушани сите засегнати страни пред затворањето на предметот.
Од партијата бараат Ислам Абази да поднесе оставка, оценувајќи дека со ваквите одлуки дополнително се урива довербата на граѓаните во правосудниот систем.