Панихида за сите загинати и починати кои се бореле за Македонија од Гостивар и гостиварско

Во гостиварскиот храм „Успение на пресвета Богородица“, денеска во присуство на голем број граѓани беше одржана Панихида за сите знајни и незнајни борци,патриоти од Гостивар, кои животите ги дадоа за слободна, независна и суверена Република Македонија.

Гостиварчани се помолија за душите на загинатите и починатите македонски патриоти. Со панихидата чиноначалствуваше прота -ставрофор Боге Богоески, надлежен архиереј на гостиварското архиерејско намесништво на Тетовско-гостиварската епархија.

Панихидава ја посветуваме во чест на сите знајни и незнајни борци и херои од Илинденското востание, на комитите и војводите, на партизаните и борците учесници во НОБ, на борците од воениот конфликт од 2001 и 2015 година, ветераните и за сите кои се бореле со оружје и со перо за самостојна Македонија, истакна Виде Димитриески, од Иницијативниот одбор за организирање на Панихидата и додаде:

Се потсетуваме на сите великани и ветуваме дека нивниот аманет, заклетва и борба е и наш аманет, наша борба и обврска дека ќе продолжиме да ја чуваме, да се бориме и да ја одбраниме Република Македонија, им ветуваме дека ќе ја градиме и развиваме и воедно оставаме аманет на идните генерации да го продолжат вашиот и нашиот пат.

Димитриески во името на присутните на загинатите и починатите македонски патриоти им вети дека никогаш нема да ги заборават; Вие сте во нашите мисли и животи, ќе ве запишеме во историјата на нашиот град и на Република Македонија.

Вечна Ви слава илинденци, партизани, херои, патриоти, бранители , ветерани, велкикани наши.

АМИН!

Македонска нација