Марија Емилија Кукубајска                                                                                                31.12.2022

Дали времето и понатаму да се брои по стара и нова ера, по вера или по галактички промени? 

Дали ќе сум цел и свој, во епските преуредувања диктирани и од светли и од темни умови?

Дали ќе сум дел од глобалната мануфактура што аплицира делови од органскиот човек, во пост-телесно постирање во постчовечни арт-ифициелни, анти-духовни креатури?

Дали ќе дозволам да сум транспортиран од непознати знаци и звуци на пренаселената вселена?

Дали ќе ме измамат уметници во науките за воинствени планови за планетата или јас ќе го спасувам човештвото во кое сеуште верувам дека е Божји дар?

Дали финансиите и филозофиите едни со други ќе се лажат или и натаму ќе се женат-мажат?

Дали владите и властите ќе пукаат по сите шавови на илузорните граници, за да блескаат со ослободена моќ на експлодирани демократии?

Дали ќе одиме голи и боси, премрзнати и претепани од господарите на фосилите, па без нафтени деривати да нема ни парафини за здравјето, ни лажно фини подземни Прозор-пини?

Дали земјоделците ќе постанат бездел(ни)ци, сточарите кравоубијци, а храната ќе ја забранат екологистите, ајкулите ќе изгубат имунитет, китовите - интелигентен интегритет?

Дали одбраната ќе успее да спречи идна болест која не се лечи со ниедно медицинско чудо?

Дали дигиталната трансформација ќе помогне на секоја нација да си ја докажува и развива својата најдобра посебност среде нелегитимни разлики во платформи, норми и влогови во лажни блогови?

Дали највисоките вредности на човечноста нема да се повлечат подземја, како водата што се губи под пустината, или ќе треба да ги топиме ѕвездите за ново-стара исконска каша на создавањето?

Дали народите ќе можат во иднина да се одржуваат и подржуваат едни со други кога до сега се делеле, селеле, силувале и угинувале - од исконскиот антагонист, лажен принц вирусиран во нив?

Дали нема да има опозиција против испорака на најпопуларни и најкорисни средства и начини за народот, популацијата да има бенефит, популистички, масовен, не само селективно елитистички?

Дали длабокиот код ќе биде достапен и за скриен енерговод и за видливи интер-фејс операции?

Дали некој ќе процени егзактно и дефинитивно зошто човештвото мора да се редуцира за да просперира, или ќе се развива најинтензивно облагородување на празните земјини простори. 

Со кои инстанци, домашни или на странци, човекот ќе може да комуницира, за рационално и реално инвестирање во сопстен избор на слободно славење на својот род и сој и разум и спокој?

Дали лидерството ќе биде привилегија за сите што умеат и знаат да водат кон сопствен и општ напредок на фамилијата на единката, и на фамилијата на планетарните народи?

Дали ќе може да сме партнери само со незастареното Добро и Убаво, среде хаосот од зовриени субатомски честички, со експлозивни реакции и идеолошки фракции за освојување и покорување.