Обединетата Македонска Дијаспора (ОМД) со жалење ја проследува недемократската политичка рокада во Владата на Република Македонија, особено назначувањето на Талат Џафери како нов премиер на земјата. Неизбран од народот, член на партија која е најконтроверзна во Собранието и човек кој кренал оружје против сопствената држава. Ова дефинитивно не e лидерот кој треба да ја застапува Македонија.

Командант Форина, како што бил познат во неговите војнички денови, е дезертер од армијата на Република Македонија. Тој е поранешен член на терористичката ОНА, кој наредувал погубување на македонски мажи, жени и деца, кој пукал против својата држава, кој се борел таа земја да ја нема. Тој човек од утре ќе биде првиот премиер Албанец во Македонија. 

ОМД смета дека именувањето на Џафери за премиер остава траен, црн белег за албанската заедница. Во Македонија живеат многу образовани и професионални изградени македонски албанци кои сметаме дека професионално би можеле да ја извршуваат оваа функција, некои кои веќе се во Владата. Наместо да им се даде можност на нив, се валка самата функција на премиер со назначување на човек со анти-државно минато. 

ОМД ги повикува чинителите на политичките партии во Македонија да престанат со оцрнување и понижување на македонскиот народ. Иако ОМД е против неуставниот концепт на техничка влада, го прифаќаме како неминовно зло до неговото укинување само под еден услов: избраните раководители, посебно премиерот, да се неизвалкани кадри кои ќе работат за доброто на земјата. Џафери, како поранешен паравоен командант, не е достоен за таа функција и неговиот избор треба да се преиспита што е можно побрзо, за доброто на сите граѓани.