Свекрва

СДС води политика на геноцид врз сопствениот народ!

Германското племе Вандали во 455 година го разрушиле и ограбиле градот Рим. Оттука под поимот вандализам денес се подразбира деструкција и скврнавење, односно уривање и разорување на културно-уметнички споменици. Ваквиот чин обично има за цел да го сотре идентитетот и да уништи цел еден народ. Во текот на повеќе од еден и пол милениум вакви чинови кога се уништуваат помали народи има многу во светот, но нема пример кога домицилната власт ја ништи сопствената култура.

Зачудува фактот што денес една македонска влада бара од општината Центар да се избришат маркичките за Порта Македонија и споменикот на Мајка Тереза. Исто така, чудно е што работна група за проектот Скопје 2014, уште во 2017 година покрај барањето за бришење и уривање на овие два споменици, бараше и да се дислоцираат спомениците од Плоштадот Македонија.

За учесниците во проектот Скопје 2014, како и за најголемиот дел од македонскиот народ, уривањето на Порта Македонија, без разлика дали е нечија копија и што е изградена во поново време е антицивилизациски чин, бидејќи на неа рељефно е прикажана целата историја на Македонија. Исто така, за Македонецот, дислокацијата на спомениците од главниот плоштад би бил уште еден атак врз македонскиот идентитет и обид за ништење на македонскиот народ.

Проектот Скопје 2014 кој ја преставува македонската историја, денешната власт го смета за акт на дивјаштво и простотилок. Вината му ја препишуваат на екс премиерот Никола Груевски. Меѓутоа, овој проект привлече голем број на странски и домашни туристи, на кои им ја престави вистината за македонскиот народ, вистинската историја на Македонецот.

Тоа сега им смета на соседите, со кои оваа власт потпиша договори со кои се негира името, постоењето на македонскиот народ, јазик и идентитет. Со Преспанскиот договор, Македонија се откажа од антиката, а со Договорот за пријателство со Бугарија ќе се откаже од историјата се до АСНОМ 1944 година кога е создадена новата македонска држава.

Старо-новите македонски власти ја продолжуваат политиката на геноцид врз сопствениот народ. Но за земја во која вандалски се однесува власта кон сопственото културно наследство, потоа земја во која не владее правото и во која се носат закони за лични интереси, а се спротивни на интересите на македонскиот народ, нема место во ЕУ.

Драги мои браќа и сестри, во овие мигови кога минатото ни се пресликува во сегашноста, кога повторно ни е наметнато прашањето за нашиот идентитет потребно е храбро, одговорно и гордо сите заедно да кажеме: Доста е!

Да кажеме: Доста е! Затоа што нашето единство денес како и многупати досега е историска потреба, затоа што само на тој начин сплотени околу заедничките национални и државни интереси можеме да продолжиме да градиме демократска, модерна и слободна македонска држава, која ќе биде почитувана и уважувана од сите народи и држави во светот. Македонскиот народ и чесните граѓани одамна го заслужуваат тоа.

Конечно јасно и гласно да кажеме, нема да дозволиме да ни ги уништат корените, да не обезличат, посрамат и понижат.

Заради сето ова, гордо и со крената глава да кажеме: Доста е!

Време е оваа власт да си замине од историската сцена бидејќи е погубна, како за македонскиот народ така и за целата македонска нација. Едноставно со својата политика таа ја води државата кон тотално распаѓање и распарчување на земјата.  

Вечна да е Македонија!