M-р Мартин ТРЕНЕВСКИ, поранешен министер и екс-амбасадор

(ЦРТИЧКИ И ОТРОВНИ СТРЕЛИЧКИ - 184?)

1. Не можам да одолеам а да не коментирам неколку детали од годинешнава таканаречена прослава на 8-ми септември - Денот на независноста на Република Македонија.

Иако власта глумеше да прикаже дека тој ден е национален празник за сите граѓани на државата (!?), недвојбен е впечатокот дека сепак таа (актуелната власт) си направи приватна забава од која најбескрупулозно и што е наjжално свесно и планирано беше исклучен поголемиот дел од народот, конкретно припадниците и симапизерите на опозицијата! А оние несреќи Пендаровски и Ковачевски не пропуштаа во секоја прилика во своите беседи да повикуваат на потреба за единство, заедништво, сплотеност, неопходна "сега, како никогаш"!?

   Сценаристите и организаторите на таканаречената прослава на Денот на независноста првото промашување го направија на 7 септември, кога на приемот што го приреди спикерот на Собранието Талат Џафери, алијас командант Флорина, еден од командантите на терористичката ОНА - бивш мајор на ЈНА кој дезертирал од касарната во Врање, каде женаму била благајничка и наводно (според тврдењето на еден генерал во емисијата "Во центар" на Васко Ефтов) при бегството си ги понела сите пари од благајната во касарната, биле поканети и двајца поранешни претседатели на Собранието, Стојан Андов (С.А.) и Тито Петковски (Т.П.)! Сметам дека на овие двајцата не им беше место на приемот!!! Па Стојан Андов д е з е р т и р а ш е  на денот кога го реализиравме Референдумот на 8-ми септември 1991! Тој воопшто не се појави на гласачко место тој ден (иако последователно глумеше во монтирано студио дека го прави токму тоа) да се изјасни дали е за суверена Македонија, туку по совет на генерали на КОС се криел во селата помеѓу Богданци и Гевгелија!!! А сега се шепури небаре тој е најзаслужен за успехот на Референдумот. Но историјата ја забележа оваа негова постапка и секако нема да му прости.

    А и лицето Тито Петковски не беше голем ентузијаст за чинот што  го правевме тој 8-ми септември 1991, а беше наклонет повеке кон вториот дел од референдумското прашање:"...со право да се здружи со другите држави од бивша Југославија". Но тој (Т.П.) е еден од основачите на СДСМ (демек трансформираните поранешни комунисти) и затоа им се вклопуваше да биде поканет на сценаристите на приемот на командантот Флорина во македонското Собрание.

   Вистински скандал е што на контроверзниот прием не беше поканет член на семејството на пок. премиер на п р в а т а  (Експертската) влада на независна Македонија Акад. д-р Никола Кљусев, ниту пак било кој член на таа влада (половината веќе се починати) бидејки токму таа влада, го подготви и го реализираше историскиот референдум за независност, а не Стојан Андов и нему слични.

   Следното големо промашување се случи веќе претпладнето, на 8-ми септември во вила Водно, каде Стево Пендаровски додели ордени на четири заслужни добитници на олимписки медали, кому и јас од срце им честитам. Ама и таков чин во типично македонски стил и манир не може а да не помине без скандал. Јавно го прашувам Стевота: Aлo, Претседателе, зошто орден не му додели и на Аце Русевски, освојувач на бронзен медал во бокс на олимпијадата во Монтреал 1976? Дали ти пречеше што тој и приѓа на опозицијата, или...? И Претседателе, ако на Крсте Црвенковски неодамна посмртно му додели орден, зошто не го одликува посмртно и легендата на македонската кошарка Благоја Георгиевски - Буштур, учесник на две олимпијади, 1992 во Минхен и 1996 во Монтреал, каде во колективен спорт, кошарка, освои сребрен медал???

   Па може ли оваа ненародна и антимакедонска номенклатура конечно да се ослободи од идеолошките стеги и  гротескната пракса на ретуширање на историјата наследена од комунизмот и да ги гледа и да ги вреднува луѓето според нивните заслуги за татковината, а не според тоа во што веруваат или каде (политички) припаѓаат? Па како сакате и очекувате единство и сплотување со ваквиот одбивен и некараден однос, со игнорирање и понижување на неистомислениците  - вие, узурпатори на власта што ја распродадовте Македонија и се што е македонско???

   Врв на партизацијата на Денот на независноста секако беше одавањето почит на двата поранешни претседатели на Републиката - Киро Глигоров и Борис Трајковски, според соопштението од Кабинетот на Претседателот: "Во Алејата на великаните на градсите гробишта Бутел во Скопје". Колку за потсетување, пок. Претседател Борис Трајковски НЕ Е сахранет во Алејата на великаните!!! Зошто? Не знам! Дали некој сметаше дека пок. Борис не е достоен да почива до Лазар Колишевски, Видое Смилевски и сличните, или?  Неговото вечно почивалиште е стотина метри подалеку, а недалеку од неговиот гроб почива и првиот премиер на независна Македонија Акад. д-р Никола Кљусев чија влада го спроведе монетарното осамостојување на  независна Македонија, ја формира Армијата на Република Македонија, Македонската дипломатија, со еден збор ги постави темелите на современата македонска држава!

   Колку и да настојуваат идеолошките фундаменталисти (фанатици) од власта да ја игнорираат и избришат од историјата Првата влада на независна Македонија со приватни забави каква што приредија на овој 8-ми септември (слично беше и претходните неколку години), не ќе можат бидејки фактите се неспорни, а и сведоци има сеуште многу.

   А што се однесува до единството и обединувањето, со ваков однос тоа само се разнебитува што, впрочем, можеби е цел на нашите непријатели во стилот на oнаа латинска "раздели па владеј" (divide et impera).