Македонска нација

Негирањето на македонското постоење од речиси сите досегашни бугарски генерации не е нешто ново, уште помалку дека треба да не изненади доколку продолжи. Напротив, Македонија и Македонците знаат до каде оди искреното пријателство на бугарската држава.

Почитуваат само независна Македонија, како географска територија, без уважување на националните атрибути и идентитетот, кој во крвта го носи македонскиот народ. Веќе тука настанува спорот.

Последниве години властите во Софија играат топло-ладно во односите со Македонија. Од категорична и недвосмислена поддршка за нашето државно постоење, до крајна негација за егзистирањето на нашиот етнички идентитет. Некаде помеѓу е проектот за доделување бугарски пасоши и бугарски државјанства на Македонци, кои својата логика на живеење повеќе ја насочиле кон материјалното, отколку кон националното.

Нејсе. Најголемиот кочничар во развојот на македонско-бугарските односи неспорно е различното толкување на историјата. За нас таа е јасна, различна од бугарската, крајно спротивставена на бугарските толкувања, а за нив е иста, неодвоива, меѓусебно зависна и поврзана. Врз основа на овие различни постулати, денес се создава затегната атмосфера не само помеѓу владите во Скопје и  Софија, туку и меѓу самите народи во обете држави. И тука почнуваат уцените, ултиматумите и заканите на нашиот источен сосед. Тие биле влезени во Европската унија, а ние сме во чекалната за прием.

Дај му на човек власт, за да видиш што човек е. Дај им на бугарите членство во ЕУ, за да видиш што држава се.

Како одминува времето се појасно е дека партиципацијата на Бугарија во ЕУ е повеќе деструктивна отколку конструктивна. Тие едноставно не само што ги искористуваат своите позиции на рамноправни членки, туку и ги злоупотребуваат за постигнување шовинистички цели, кои се граничат со лудило и шизофренија. Европа мора конечно да се отвори и да почне да спроведува јасна политика во поглед на справувањето со ваквите нелогичности. Таа треба да излезе од лавиринтот и ќорсокакот во кои западнала и конечно да и покаже со прстот на Бугарија, дека местото на нивната политика и дипломатија е во Средниот, а не во 21 век.

Пласирањето историски небулози и фалсификати за македонската историја е политичка пракса на софиските политичко-историски установи. Потпирајќи се врз лаги и искривени факти, бугарските современици се обидуваат да променат една цела ера на македонизмот, кој постои во својот изворен облик од античкиот период, па се до денешново современие.

Континуираната асимилација и дискриминација на македонското население во Пиринска Македонија е проблем за кој Бугарите не сакаат да разговараат. Зошто? Се плашат од нивната бројка, стравуваат од нивното политичко здружување и дејствување?

Па, нели се малку, нели броеле неколку стотици само? Тоа е занемарливо во споредба со вкупното население во Бугарија. Или бројките кажуваат нешто сосема друго.

Паниката во бугарските редови одамна е позната и прочитана. Но, борбата за права и слободи не може да се сопре со некаква забрана за дејствување на македонските организации или со стопирање на нивното учество на некој изборен циклус. Таа е посилна од се. Софија е исправена пред ист предизвик. Тие, кога тогаш, ќе мораат да ја спознаат стварноста. Тие ќе мора да се раководат по принципите на човечноста, а не според актите на нивното фашизоидно минато. За такви политики повеќе нема место во современа Европа.

Поимот Македонец не е географски, туку национален. Секоја држава го добива своето име по народот кој ги населува, па така Македонија во етногеографските граници од 1913 година ги опфаќа териториите не само на античка Македонија, туку и на јужниотдел од Дарданија, источен Илирик, Пеонија, западна Тракија, како и дел од Епир. На сите овие подрачја живеел македонски народ.

Затоа се неосновани тврдењата на современите бугарски историчари и политичари дека Македонците го носат тоа име, само поради тоа што потекнуваат и живеат на територијата на географската област Македонија.

Дали Бугарите знаат дека Пиринска Македонија е западна Тракија, дека поимот Македонец во Пирин значи етнос, а не географски термин? Очигледно е дека целокупната бугарска историографија, во делот на македонизмот, треба да претрпи длабока ревизија. Тоа би било во интерес и на сегашните и на идните генерации Бугари.

Срам и грев е да живеат во една вештачки наметната заблуда.