Македонска Нација
Од 4 до 8 август во Струмица, традиционално по 21. пат, ќе се одржи Интернационалниот филмски фестивал „Астерфест“.
Годинешното фестивалско мото е „Со отворени очи“, со кое независните филмски автори симболично ја повикуваат публиката да го следи животот како филмска лента, низ бројни приказни од различни краишта на светот.
Фестивалот, препознатлив во регионот и во меѓународната фестивалска мрежа, и оваа година останува посветен на авторскиот филм. Програмата опфаќа дваесетина строго селектирани нови и квалитетни филмови од повеќе видови и жанрови, меѓу кои кусометражни и долгометражни остварувања.
Во програмските блокови „Глобална фикција“, „Астердокс“, „Анимоушн“ и „Меридијанс“ ќе бидат прикажани филмови од Канада, Данска, Грузија, Грција, Германија, Чешка, Велика Британија, Франција, Палестина, Мексико, Шпанија, Кина, Хонгконг, Бугарија, Полска, Русија, Норвешка, Јужна Кореја, Мозамбик и Македонија.
Меѓу насловите се канадскиот „Девојчето што ронеше бисери“ на Крис Левис и Мациек Шчербовски, данскиот „Душа птица“ на Тобијас Кампман, грузискиот „Земјата на мажите“ на Маријам Бакачо Хачвани, грчко-германскиот „Изгубени гардении“ на Галатија Лагутари, чешко-британско-македонскиот „Крајолици на човештината“ на Јана Хунтерова, британските „Нешто бесмислено“ на Ејса Бејли и „Без милост“ на Ема Зафировска, како и македонските „Неми филмови“ на Крсте Господиновски и „Остров“ на Бранко Костески.
Покрај натпреварувачката програма, секоја вечер ќе има и ревијални проекции. Посебно внимание ќе привлече документарецот „Версус: животот и филмовите на Кен Лоуч“, во знак на 90 години од раѓањето на легендарниот британски режисер и една деценија од продукцијата на филмот.
Ексклузивна проекција ќе има и македонско-швајцарско-американскиот документарно-игран филм „Железна тврдина“, по сценарио и во режија на Митко Панов. Во чест на наградените ќе биде прикажан и „Филм до вжештување“ на Дарко Баиќ, биографски филм за Боро Драшковиќ, еден од најзначајните европски режисери.
Со посредство на Шведскиот филмски институт, специјална проекција ќе има и дигитално реставрираната верзија на „Жртвопринесување“ на Андреј Тарковски, по повод 40-годишнината од продукцијата на ова филмско ремек-дело.
Лауреат на престижната награда „Астер“ оваа година е Синоличка Трпкова. Признанието ѝ се доделува за највисоки достигнувања во македонскиот, балканскиот и светскиот филм, како и во телевизијата и драмските уметности.
По тој повод, Трпкова изјави дека „Астерфест“ ѝ причинил невообичаена радост со одлуката нејзиното име да биде вброено покрај големи филмски имиња, нагласувајќи дека наградата гради однос на доверба и одговорност.
Наградата на Синоличка Трпкова ќе ѝ биде врачена на свеченото отворање на фестивалот, на 4 август.
Главна локација за вечерните проекции е летниот Амфитеатар во струмичкиот Градски парк, а вонредна локација е Домот на АРМ. Промоцијата на актуелната филмска литература, мини работилницата и мастеркласот ќе се одржат во Младинскиот културен центар. И оваа година е предвидена посета на филмските гости во манастирот „Воведение на Пресвета Богородица Елеуса“ во Велјуса.
За Гран-прито, Златната, Сребрената и Бронзената потковица, како и за наградите за најдобро сценарио „Ѓорги Абаџиев“ и за најдобар режисер „Ацо Алексов“, ќе одлучува меѓународно стручно жири.
Официјалниот плакат, кој кореспондира со овогодишното мото, е дело на Ване Костуранов, а уникатните статуетки ги креираше и ги изработи Никола Пијанманов.
Филмскиот фестивал „Астерфест“ е финансиски поддржан од Агенцијата за филм на Република Македонија и од Општина Струмица.
