Зошто опозицијата е против македонската дијаспора да добие право да гласа електронски — и од што се плаши?
Премиерот Христијан Мицкоски порача дека македонската дијаспора мора да добие можност да учествува по електронски пат на следните претседателски избори, оценувајќи дека тоа е современо, европско и демократско решение кое ја поврзува Македонија со нејзините иселеници ширум светот.
Според Мицкоски, токму оние политички структури кои во минатото ја понижувале, распродавале и блокирале Македонија, денес повторно се обидуваат да застанат на патот на реформите и напредокот.
„Истите тие кои ја крадеа, распродаваа и понижуваа Македонија, сега грчевито се борат да ја блокираат. Исплашени се дека, по декемврискиот извештај, сега и во јунскиот извештај на Европската комисија за напредокот на земјите од Западниот Балкан повторно ќе бидеме најдобри“, порача Мицкоски.
Тој нагласи дека Македонија, и покрај блокадите, ќе продолжи да напредува и да обезбедува најмногу буџетски средства и отворени фондови за финансирање на проекти.
„Имам лоша вест за нив и нивните коалициони леви партнери: Македонија ќе ве победи вас и вашите блокади“, истакна Мицкоски.
Во фокусот на неговата порака е Изборниот законик, законско решение кое, според него, со месеци било договарано со опозицијата и во кое биле прифатени сите нивни предлози. Единственото барање од власта било македонската дијаспора да може да гласа по електронски пат уште на следните претседателски избори.
„Блокираат закон кој со месеци го договараа. Закон во кој им прифативме сѐ што предложија. Единственото нешто што побаравме е дијаспората да може да гласа по електронски пат уште на следните претседателски избори. Прво го прифатија, а денес го блокираат и бараат бледи алиби-аргументи“, рече Мицкоски.
Премиерот ги повика пратениците од СДС да поднесат амандмани доколку имаат конкретни забелешки за начинот на заокружување или поднесување приговори, додавајќи дека таквите корекции веднаш ќе бидат прифатени.
„Ајде вака: предложете амандмани со кои барате корекција на начинот на заокружување и поднесување приговори. Веднаш ќе ви ги прифатиме. Повлечете ги другите амандмани и да го изгласаме Изборниот законик“, порача тој.
Мицкоски нагласи дека македонската дијаспора е нераскинлив дел од Македонија и дека државата има обврска да ѝ овозможи полесно, побрзо и современо учество во демократските процеси.
Електронското гласање за дијаспората не е само техничко прашање, туку прашање на почит кон илјадници Македонци кои живеат надвор од татковината, но остануваат поврзани со неа, со нејзината иднина и со нејзините државни интереси.
„Нашата дијаспора има право да учествува по електронски пат на следните претседателски избори, во време кога во светот вештачката интелигенција ќе има клучна улога“, истакна Мицкоски.
Со оваа порака, Мицкоски јасно посочува дека вистинските европски реформи не се празна реторика, туку конкретни решенија кои ја модернизираат државата, ја зајакнуваат демократијата и ја враќаат дијаспората таму каде што припаѓа — во срцето на Македонија.
