Македонија не смее повеќе да води политика на потчинување и еднострани отстапки кон Бугарија, каква што повторно нудат СДС и Венко Филипче.
Билатералните прашања мора да се решаваат врз основа на реципроцитет, меѓусебно почитување и доследно исполнување на обврските од двете страни. Потребен е отворен и искрен дијалог, но и јасно почитување на преземените обврски. Македонија нема да прифаќа нови условувања и дополнителни барања кои не се дел од европските критериуми.
Венко Филипче и СДС повторно ја промовираат истата политика на попуштање и сервилност која со години ги поткопуваше македонските национални позиции. Наместо да извлечат поука од грешките на минатото, тие ги нудат истите политики што ја доведоа државата во политички и дипломатски ќор-сокак.
Филипче сѐ почесто настапува со ставови кои се совпаѓаат со официјалните позиции на Софија, наместо со интересите и очекувањата на македонските граѓани. Наместо да бара реципроцитет и почитување на македонските позиции, тој предлага нови отстапки и враќање на политики кои граѓаните веќе еднаш ги отфрлија.
Наместо да ги бранат државните и националните интереси, СДС и Филипче се подготвени на нови отстапки без јасни гаранции, без конкретни резултати и без сигурност дека тие ќе донесат каков било напредок за Македонија.
Граѓаните јасно порачаа дека ја поддржуваат европската иднина на државата, но не по цена на нови понижувања, условувања и оспорувања на македонскиот идентитет, јазик и историско наследство. Европската интеграција не смее да биде процес во кој само Македонија исполнува обврски, додека другата страна останува без одговорност за сопствените преземени обврски.
Националните интереси, идентитетот и достоинството на македонскиот народ не смеат да бидат предмет на политички трговии и нови отстапки.
Времето на еднострани отстапки заврши. Време е за реципроцитет, заемно почитување и еднаков третман.
Владата предводена од ВМРО-ДПМНЕ останува цврсто посветена на европскиот пат на Македонија, но нема да прифати уцени, диктати и дополнителни барања кои излегуваат надвор од европските стандарди и критериуми. Очекуваме и Бугарија да ги исполни своите обврски, вклучително и почитувањето на пресудите на Европскиот суд за човекови права.
ВМРО-ДПМНЕ ќе продолжи достоинствено, одговорно и принципиелно да ги брани државните и националните интереси и нема да дозволи евроинтегративниот процес да се претвори во механизам за нови уцени и притисоци врз македонскиот народ и држава.
