На 20 август се потсетуваме на личности и настани поврзани со македонската револуционерна борба, култура и духовност.
20 август 1873 – Роден е Миле Поп Јорданов
Во Велес е роден Миле Поп Јорданов, македонски револуционер и член на Македонската револуционерна организација. Загинал на 4 мај 1901 година во селото Ораовец, жртвувајќи се за своите соборци и населението. Неговата саможртва е овековечена во песната „Болен ми лежи Миле Поп Јорданов“.
20 август 1903 – Завршува Конгресот на Серскиот револуционерен округ
Од 18 до 20 август 1903 година, во месноста Ливада кај селото Пирин, се одржал Конгресот на Серскиот револуционерен округ. Делегатите, меѓу кои бил и Јане Сандански, одлучиле востанието во округот да започне на Крстовден и да има партизански карактер.
20 август 1903 – Уништено селото Загоричани
Поради масовното учество на жителите во Илинденското востание, османлиската војска го гранатирала, запалила и речиси го срамнила со земја селото Загоричани во Костурско. Овој настан останува сведоштво за страдањето на Македонците во Егејскиот дел на Македонија.
19 август-Голо Брдо-село Ербеле
Празникот Преображение Господово има посебно значење за Македонците од областа Голо Брдо, како и за македонското население од поширокиот дебарски крај во Албанија. На овој ден, црквата „Свето Преображение“ во селото Ербеле традиционално станува средиште на голем празничен собир.
