Собранието на Република Албанија со 120 гласа “за“, едногласно, го донесе Законот за враќање на македонското име на општина Пустец.

- Неправдата е исправена. Ова е историска придобивка на Македонците во Албанија и поттик за натамошно унапредување на положбата и правата на Македонците. Ние сме лојални граѓани на Република Албанија, таа е наша татковина, и оваа одлука на Собранието на Албанија е заслужена и долгоочекувана, - беше првата реакција на градоначалникот на општина Пустец, Едмонд Темелко, кој истовремено е претседател на Македонската партија во Албанија.

На седницата на Собранието на Република Албанија за време не донесувањето на Законот за враќање на македонското име на општина Пустец, присуствуваа Едмонд Темелко, градоначалник на општина Пустец и претседател на Македонската партија во Албанија и Васил Стерјовски, претседател на Унијата на млади сили на Македонската партија во Албанија.

Светскиот Македонски Конгрес упати искрени честитки за донесувањето на Законот за враќање на македонското име на општина Пустец и очекува на престојните парламентарни избори Македонците во Албанија, единствени и обединети, преку единствената Македонска партија во Албанија, да добијат пратеник во Собранието на Албанија.