Александар Џеповски
Свети Илија длабоко живее во духовната свест на македонскиот народ. Неговиот празник, Илинден, е еден од најголемите и најславните празници во Македонија – ден во кој се спојуваат верата, историјата, борбата за слобода и љубовта кон татковината.
Македонците од памтивек го почитуваат Свети Илија како силен заштитник и небесен чувар. Во народното верување тој господари со громовите и молњите, носи дожд во време на суша и ја покажува Божјата сила дури и среде топол и сончев ден.
Светиот пророк Илија живеел во IX век пред Христовото раѓање. Потекнувал од Ароновото племе и бил роден во градот Тесвит, поради што е наречен Тесвитец. Според преданието, кога се родил, неговиот татко Савах видел ангели околу него како го повиваат детето со оган. Тоа било знак дека од Бога ќе му бидат дарувани огнена ревност, духовна сила и пламен карактер.
Речиси целиот живот го поминал во молитва, пост и служење на Бога. Бил непоколеблив борец против идолопоклонството и неправдата и храбро сведочел за вистинската вера. Светото Писмо сведочи дека пророкот Илија не ја завршил земната служба на вообичаен начин, туку бил вознесен на небото во огнена кочија.
Илија повторно се појавува при Преображението Господово, кога заедно со Мојсеј разговара со Господ Исус Христос на гората Тавор. Со тоа станал сведок на Христовата божествена слава, на вечниот живот и на исполнувањето на Божјите ветувања.
На 2 август Божјата црква го прославува чесното и свето име на Божјиот пророк, чудотворец и боговидец – силниот ревнител за верата и сведок на славата Божја, светиот пророк Илија.
Во неговиот тропар се вели:
„Ангел во телото, столб на пророците, втор претеча на Христовото доаѓање – Илија славен, откако одозгора му испрати благодат на Елисеј, овој болести прогонуваше и прокажани очистуваше.“
Затоа Свети Илија им дарува духовна сила, надеж и исцеление на сите што со искрена вера го почитуваат и го повикуваат неговото име.
Илинден во Македонија одамна не е само црковен празник. Тој е дел од македонската историска судбина и симбол на вековната борба за слобода. Под името на Свети Илија се испишани најсветлите страници од нашата историја – од древната борба на македонскиот народ, преку Крушевскиот Илинден од 1903 година, до заседанието на АСНОМ на 2 август 1944 година и создавањето на современата македонска држава.
Свети Илија отсекогаш бил духовен закрилник на македонскиот народ. Тој е присутен таму каде што живеат Македонци, каде што се чуваат македонската вера, името, јазикот, традицијата и споменот на предците.
СВЕТИ ИЛИЈА ОД СЕГОГАШ ПОМАГАЛ И ГО ШТИТИ МАКЕДОНСКИОТ НАРОД И ДОКАЗ СЕ ТРИТЕ ИЛИНДЕНИ ОД ХЕРОНЕЈА ПА ДО ДЕНЕС. САМО СО НЕГОВА ПОМОШ ПРЕКУ БОГА МАКЕДОНИЈА МОЖЕ ДА ПОСТОИ И ОДИ НАПРЕД. СРЕЌЕН ИЛИНДЕН МАКЕДОНЦИ И ЗА МНОГУ ГОДИНИ НЕКА НЕ ПРАТИ, ЗАШТИТУВА И БИДЕ СО НАС МАКЕДОНЦИТЕ ЗА ВЕК И ВЕКОВИ.
АМИН !!!
За многу години!
