Костадин Самарџиев (15. V 1884 – 1. VIII 1911) е македонски револуционер, струмички деец на Македонската револуционерна организација. Познат како Џемото, бил назначен за раководител на струмичкиот окружен комитет на Македонската револуционерна организација.
Костадин Самарџиев, е роден на 15 мај 1884 година во струмичкото село Дабиље. Учел во Струмица, а потоа завршил педагошко училиште во Скопјe во 1903 година. Во Скопје се запознал со други револуционери, меѓу кои и со Алексо Мартулков. Тој предавал во Дабиље помеѓу 1903 и 1904 година и во Робово помеѓу 1904 и 1905 година.
Самарџиев развил револуционерна дејност во Струмица и Струмичко. Во 1905 година, бил уапсен и затворен во солунскиот затвор „Еди Куле“. Од мај 1906 до јули 1908 година, бил четник кај Христо Чернопеев. Тој бил и секретар на Струмичкиот окружен револуционерен комитет и играл важна улога во организирањето на локалните револуционерни активности.
Во јануари 1906 година, тој организирал масовни демонстрации во Струмица по повод убиството на петмина селани од Струмичкиот крај. Околу 8.000 луѓе од градот и околината, побарале од струмичкиот кајмакам да ги запре политичките убиства.
По Младотурската револуција од 1908 година, Самарџиев бил легализиран и станал селски старешина во Струмица. Во април 1909 година, тој ги предводел струмичките доброволци во Младотурската кампања против апсолутизмот на султанот Абдул Хамид II.
Во 1909 година, тој бил еден од основачите на Народната федеративна партија во Солун. Сепак, по кратко време, ја напуштил партијата и продолжил со своите активности за обновување на револуционерната организациска мрежа во околината на Струмица.
Во 1910 година, заедно со други револуционери, учествувал во голем број битки со турските власти. По кратко време, бил назначен за раководител на струмичкиот окружен комитет.
На 1 август 1911 година, Самарџиев загинал во битка во близина на неговото родно село во престрелка со турските војски. Тој бил еден од многуте борци за слобода и активен локален водач кој се борел за ослободување на Македонија.
Во декември 2022 година, во некрополата под струмичката тврдина Цареви Кули, археолозите од Струмица откриле ѕидани гробови од крајот на 19 и почетокот на 20 век, а во еден од нив пронашле и пушка и муниција од тој период. Археолозите претпоставуваат дека гробовите се на војводите Костадин Самарџиев Џемето и Крсто Новоселски.
