Александар Џеповски
Македонија имала и секогаш ќе има свои големи, па и преголеми денови и значајни празници. Ако Господ ги покаже сите тие златни денови, ќе треба да се додадат уште илјадници страници во календарот за некако да се сместат. И тогаш тешко ќе може да се одреди кој ден е поголем и позначаен од другиот.
Но 8 Септември е посебен, возвишен и светол ден.
Денес добро знаеме дека мрачните сили и западните империјалисти правеа сè, па и триста чуда, за да ја истребат Македонија и да го избришат дури и нејзиното име.
Ја парчеа и ја делеа македонската земја, создаваа нови држави, измислуваа кралства и царства врз светата земја благословена од Бога, а потоа славеа голема победа.
Со лажни истории и измислени докази запливаа во сопствениот лавиринт од лаги и мизерија. Но колку повеќе навлегуваа во него, толку појасно се гледаше дека тонат и дека еден ден ќе се удават во сопствените невистини.
Ни го забрануваа името, нè преименуваа во Вардарска Бановина, потоа нè означуваа како ФИРОМ, а на крајот ни го наметнаа и префиксот „Северна“. Но сè им беше залудно – Македонија остана Македонија во срцата на Македонците.
На 8 Септември Македонија воскресна којзнае по кој пат. Но овој пат воскресна со Сонцето од Кутлеш како свое знаме и со своето исконско име – Македонија.
Тоа е преголем историски настан. Сето време, сите милијарди и трилиони долари и сето злато вложени против Македонија беа поразени на кантарот на историјата од еден навидум обичен ден, кој за Македонија стана величествен, горд и светол – 8 Септември 1991 година.
Сега сите негатори и вампири што со векови ја цицаа македонската крв можат само немоќно да гледаат. Историјата и реалноста одат во наша полза, а на нивна штета.
Македонија и Македонците се пиреј – колку и да ги газат, повторно никнуваат. Тие се како подземна жива вода: можеш привремено да го запреш нејзиниот тек, но таа повторно ќе го пронајде патот кон светлината.
Денот е наш и е навистина голем. Сите денови во календарот се премалку за да се опишат македонската голгота и македонската слава.
Нека ни биде вечен 8 Септември! Нека биде ден на сите Македонци и вечен спомен за оние што ја пролеаја својата крв за нашата Македонија, верувајќи дека нивната жртва и нивните животи нема да бидат залудни.
Нека е честит 8 Септември – Денот на независноста на Република Македонија!
Нека е вечна Македонија!
