Македонска Нација
РСВР на СР Македонија – Испостава Штип
Ев. бр. 472
Берово, 7 август 1978 година
Отчукано во 3 примероци
СЛУЖБЕНА БЕЛЕШКА
I. Податоци за контактот
- Објект: Ѓоко Н. – сопственик на кафаната „Ново Скопје“ во Берлин, СР Германија.
- Контактот е остварен по наша иницијатива.
- Оперативни трошоци нема.
II. Цел на разговорот
Изворот беше насочен кон следење на пропагандно-субверзивната активност и врските на одредени лица со ДООМ.
III. Добиени податоци и сознанија
Изворот веќе девет години се наоѓа на привремена работа во Западен Берлин, во фирмата БИМ. Заедно со него од селото Мојмирово на работа заминале и Борис Поповски, Ефтим Тројански, Стефан Мукарски и Стојан Тасевски.
Во почетокот сите добро живееле и често се дружеле и надвор од работното време. По 1971 година Борис Поповски и Ефтим Тројански, покрај редовната работа, започнале да се занимаваат и со недозволени активности, односно шверц и други незаконски работи, при што воспоставиле врски со одредени емигрантски и германски кругови.
Подоцна тие целосно се определиле за таков начин на живот, особено по губењето на правото на работа. Како последица на тоа, повеќепати биле приведувани и осудувани на затворски казни. Според изворот, од претходната година престојувале и во Источен Берлин, каде што биле осудени поради дејствија насочени против тамошните власти.
Во тие години Борис Поповски воспоставил блиски односи со Ѓоко Н. и неговиот брат Мишко (Мане), кои биле сопственици на кафаните „Ново Скопје“ и „Македонија“. Преку Поповски, изворот ги запознал Ѓоко и Мишко, а и денес повремено се среќава со Ѓоко во кафаната „Ново Скопје“.
За Поповски и Тројански изворот навел дека биле поврзани со шверцерски кругови во Берлин, но не можел да даде повеќе информации бидејќи подоцна почнал да ги избегнува, а и тие него.
Изворот често ја посетувал кафаната „Ново Скопје“, но со Ѓоко ретко разговарал бидејќи тој ретко доаѓал таму. Според него, Ѓоко живеел во сопствена куќа подалеку од локалот.
Изворот го опишува како затворен човек и успешен бизнисмен кој располагал со значителни финансиски средства.
Во разговорите што ги водел со него забележувал изразени национални ставови. Во кафаната се наоѓале различни материјали со национална содржина. На ѕидовите и на друг инвентар била прикажана карта на целосна Македонија, а во тоа време биле финансирани и серии кибритни кутии со истиот мотив.
Во разговорите, Ѓоко често истакнувал дека македонското прашање не е целосно решено. Во СР Германија бил познат како поддржувач и финансиер на фудбалски и други активности организирани од македонски иселенички друштва.
На крајот, изворот навел дека Ѓоко често бил посетуван од пејачот Јонче Христоски и негов поранешен учител од Гостиварско.
Во Берлин, Ѓоко одржувал блиски односи и со Ѓорги Терзиски од селото Умлена, Беровско, кој исто така работел во СР Германија.
IV. Оперативен коментар
Изворот беше подготвен во текот на минатата година, а добиените сознанија се оценуваат како објективни.
Активностите за негово понатамошно оперативно користење ќе продолжат, имајќи предвид дека и понатаму ќе остане на привремена работа во СР Германија.
Особено интересни се контактите на Јонче Христоски со објектот, при што неговите посети траат и по повеќе денови.
Постои можност и пријателството меѓу нашиот граѓанин Ѓорги Терзиски и објектот да биде искористено за дополнителни разговори при неговото доаѓање на одмор во текот на овој месец.
Помошник инспектор
