Во функција на подготовка на донесување на Закон за правата на националните малцинства, во Тирана се одржа тркалезна маса во организација на Министерство за надворешни работи на Албанија.

На средбата присуствуваа претставници на сите малцинства што живеат во земјата, Македонците, Грците, Власите, Србите, Црногорците, Ромите и Еѓиптјаните, кои ги презентираа своите ставови и барања за остварување на нивните легитимни права загарантирани со меѓународното право и конвенции.

Целта на тркалезнат маса беше донесување на закон со кој ќе се утврди државна рамка за унапредување на положбата и правата на националните малцинства во Република Албанија. Присутните претставници на националните малцинства учествуваа во расправата со свои предлози и мислења.

Побаравме со законот на правата на националните малцинства да се признае статусот на малцинство на целата територија на земјата, право на образование на мајчин јазик, застапеност во државните институции, поддршка за проекти на граѓанските организации на националните малцинства, програми на државната телевизија на мајчин јазик, - рече Или Халилај, претседател на разгранокот на Македонското друштво "Илинден“ за областа Голо Брдо.

Заменик министерката за надворешни работи, Одета Барбулуши оцени дека придонесот на националните малцинства е од суштинска важност во подготовката на Законот за правата на националните малцинства во Република Албанија.

Претставниците на националните малцинства очекуваат институциите на власта на Албанија да придонесат во обезбедувањето на подобри стандарди, заштита и почитување на човековите права и на правата на националните малцинства.

Во реализацијата на овој процес вклучени се и здруженијата на националните малцинствата и меѓународните организации.

Тркалезната маса доаѓа веднаш по средбата што претставниците на националните малцинства ја имаа со Народниот правобранител на Албанија, Игли Тотозани кој јавно побара од владата донесување на Закон за правата на националните малцинства.

Тодор Петров