Минатиот вторник, 21 мај, бев сведок на прикажувањето на англиски јазик на драмата „Борење со мечка“ од Душан Ристевски во режија на Стефо Нанцу. Да бидам искрен бев возбуден не само од самиот настан, туку и од извонредната драмска престава која ги воодушеви присутните Австралијанци, повеќето здравствени работници.

Во прекрасниот Civic Theatre во Хрствил, градско предградие на Сиднеј, екипата на австралјанско македонскиот театар од Сиднеј покажа дека нивната актерска и артистичка способност блесна на англиски јазик и ме направи да се чувствувам горд Македонец што на културно – театарско поле им покажуваме на Австралјанците дека сме нација со богата театарска култура од антикот и дека социјално – здравствените пораки ефективно можеме креативно да ги пренесеме до публиката. Публиката беше воодушевена од настапот на целата екипа која динамично презентира една реална слика на две семејства растргнати меѓу стравот и желбата да се победи најлошата болест. Покрај комичните моменти преовладуваше трагедијата – реалноста со која се соочуваат семејствата кога се борат со „мечка“.

Прикажувањето на драмата беше официјално отворена од професор David Currow, директор на Институтот за рак на Нов Јужен Велс. Потоа следеше професор Liauw, клинички директор на Одделот за рак во Јужно-источниот дел на Сиднеј кој нагласи дека здравствениот систем претставува како лавиринт низ кој многу тешко луѓето се снаоѓаат. Генералниот менаџер на Здравствениот оддел од Јужно-источниот дел на Сиднеј, Terry Clout, нагласи дека театарот како културен пристап е многу културно ефективен начин во пренесување на здравствените пораки и ваквите иновативни проекти се единствени во Австралија. Со тоа се започна кампањата наречена ‘Alive and out there - Живеам и понатаму’ наменета за македонската, арапската и грчката заедница. Драмата „Борење со мечка“ е дел од оваа кампања и ќе има водечка улога во припремање на материјал за обучување на здравствените работници во Австралија.

Да се надеваме дека и оваа драма ќе постигне интернационално признавање како драмата „Страв и срам“ за која се јави интерес да биде применета како драмски приод за намалување на стигмата во Индија и Катар.

Меѓу присутните убаво е да напоменеме дека беше и Д-р Маја Цветковска, претставник од Австралиско-македонската Докторска Асоцијација за НЈВ.

Иван Трпоски