Коментари

Пелинце испрати јасна порака: Македонија нема повеќе простор за предавства

Мане Јаковлески

Мане Јаковлески

Обраќањето на премиерот Христијан Мицкоски беше јавно ветување дека државните и националните интереси нема повторно да бидат жртвувани под притисоци и уцени

Пелинце не е обично место за политички говори. Таму секој збор има поголема тежина, затоа што сè потсетува на борбата и државотворната мисла на македонскиот народ.

Затоа изјавата на премиерот Христијан Мицкоски дека „по ниту една цена“ нема да направи предавство на штета на државата и народот е повеќе од политичка порака. Таа е јавно преземена обврска пред граѓаните и пред историјата.

„Никогаш нема да се откажам од борбата да ја направиме Македонија подобро место за живеење – наш дом и наша иднина. Јас предавства на штета на државата и народот, како што се правеше во минатото, по ниту една цена нема да направам“, порача Мицкоски.

Македонскиот народ прескапо ги плати политиките на отстапување и прифаќање туѓи услови. Секоја отстапка беше претставувана како последна, но по неа следуваше ново барање. Жртвите требаше да го отворат европскиот пат, а тој остануваше затворен додека цената за Македонија стануваше сè повисока.

Затоа зборовите од Пелинце треба да означат крај на времето во кое македонските интереси се користеа како монета за политичко поткусурување.

Мицкоски ги поврза Крушево од 1903 и АСНОМ од 1944 година како две страници од истата македонска државотворна книга. Во Крушево беше прогласена волјата за слобода, а на АСНОМ таа доби државна форма. Никола Карев и Методија Андонов-Ченто остануваат симболи на Македонија како своја, слободна и достоинствена држава.

Прашањето е дали сме достојни наследници на илинденците и асномците.

Одговорот не се дава со венци и свечени говори, туку со начинот на кој ги чуваме државата, јазикот, идентитетот и националното достоинство – особено кога притисоците се најсилни.

Секоја генерација има свој Илинден. Денешната борба не се води со пушки и црешови топчиња, туку за економски опстанок, демографска обнова, функционални институции, владеење на правото и достоинствен живот во сопствената држава.

Македонија има право на европска иднина, но нема обврска постојано да се откажува од својата национална суштина. Европската Унија треба да биде заедница на рамноправни држави и народи, а не простор во кој билатералните уцени стануваат европски услови. Европска интеграција што бара промени на историјата, националната меморија и идентитетот лесно се претвора во обезличување.

На Македонија ѝ е потребно единство околу заедничките црвени линии. Може да се разликуваме за политиките и реформите, но не смееме да се делиме кога се загрозени македонскиот јазик, идентитетот, историјата и државните интереси.

Македонија е поголема од секоја партија, функција и политичка кариера. Таа е наследство што мора да им го предадеме на идните поколенија посилно отколку што сме го примиле.

Пораката од Пелинце е јасна: времето на понижувања и отстапки мора да заврши. Нејзината вистинска вредност, сепак, ќе се мери според делата што ќе следуваат.

Затоа што Илинден не е само спомен. Илинден е аманет.

А аманетот не се преговара, не се продава и не се предава.

Најново од: Коментари

Што предвидела Баба Ванѓа за еконимски напредок на Македонија?

Баба Ванѓа (Ванѓелија Гуштерова), позната како „балканскиот Нострадамус“, е родена во Струмица во 1911 година, но поголемиот дел од својот живот го поминала во Петрич, каде што стекнала светска слава. Според едно раскажување што ѝ се припишува на Баба Ванѓа, Македонија ќе има финансиски тешкотии сè додека повторно не проработи рудникот „Алшар“ на планината Кожуф. […]

Непокорниот дух на Македонците – до кога ќе ги трпиме неправдите?

Македонија преживеала војни, поделби и туѓи владеења. Низ сите тие премрежија, Македонците го зачувале својот јазик и култура и изградиле своја држава. Секогаш кога ќе се спомене таа издржливост, се наметнува едно прашање. До кога од нас ќе се очекува да трпиме неправди и да правиме отстапки за прашања што го засегаат нашиот идентитет? Еден […]

Името Македонија од античките записи до уставните измени

Сребрена тетрадрахма од Амфипол со натпис „ΜΑΚΕΔΟΝΩΝ“ („на Македонците“), 158–150 година пред нашата ера. Музеј на уметност во Кливленд.   Името Македонија е запишано уште во V век пред нашата ера. Од Херодот и библискиот повик до апостол Павле, преку старите карти и делото на Мисирков, до Уставот од 17 ноември 1991 година. Меѓу најстарите […]

Пресказание на Голем Александр (Александар Македонски)

Во Венеција во 1845 година јеромонахот Атанас Македонец го објавил „Пресказание на Голем Александр“ (Александар Македонски), пренесувајќи старо претскажување што, според прологот на книгата, било пронајдено при ископување во Вавилон, во златна кутија, а потоа преведувано на повеќе јазици. Возбудливо видение што му се припишува на Александар Македонски. Текстот е подолг, но вреди да се […]

Уште колку ЕУ ќе нè тапка по рамо?

Европската идеја има смисла ако ги зближува народите и го почитува нивното достоинство. Македонија заслужува јасен и праведен пат до членство, по кој ќе оди со реформи и со зачуван македонски идентитет. За идеите во минатото се гинело, а за нив се гине и денес. Тие ги движат луѓето, ги обединуваат народите и го менуваат […]

Филипче, рејтингот на СДС не се крева со сирена за тревога

Дали Филипче навистина мисли дека патот до повисок рејтинг води преку повисок притисок кај граѓаните? Дека секоја вознемирена фамилија е потенцијален глас, секој исплашен пензионер — политичка добивка, а секој загрижен штедач — публика за следниот настап? СДС на чело со Филипче остава впечаток дека отвори дежурна служба за најавување пропаст. Телефонот постојано ѕвони, сирената […]

За овој настан Македонија нема да бара од Бугарија заедничко историско чествување

На 11 септември 1995 година, на аеродромот кај Штрклево, близу Русе, се собрале околу 3.000 илјади луѓе за да пречекаат вонземјани.  Според архивскиот весникарски напис, околу 3.000 луѓе пристигнале од Варна, Разград, Русе и околните села. Поводот бил најавата дека точно во 11 часот ќе слетаат посетители од наводната планета Криси за да и помогнат […]

Да се препознаеме по човечноста

„Ако чувствуваш болка, жив си. Ако чувствуваш туѓа болка, тогаш си човек.“ – рекол Лав Толстој Сфаќањето и практиката на хуманоста во светот денес се наоѓаат на важна крстосница. Глобално гледано, на хуманоста се гледа низ призмата на зголемена емпатија и поврзаност, но и низ сериозни предизвици наметнати од модерното секојдневие, технологијата и кризите. Технологијата […]

To top