Македонска Нација
30 август 1903 година – борбите во Копачијата
Во текот на Илинденското востание, на 30 август 1903 година, околу 500 османлиски војници од дебарскиот гарнизон го минале планинскиот превој Јама и го нападнале селото Душогубица во Копачијата.
Нападот бил дел од обидот на османлиската војска повторно да воспостави контрола врз востаничката територија. Населението и востаниците од Кичевско и Дебарско дале силен отпор, бранејќи ги селата и слободната територија.
30 август 1905 година – погубен Александар Турунџев
На 30 август 1905 година, на Ат-пазар во Битола, бил јавно обесен македонскиот револуционер и војвода Александар Турунџев.
Турунџев е роден во 1872 година во селото Горно Врбени, Леринско, во Егејскиот дел на Македонија. Бил член на Македонската револуционерна организација и учесник во Илинденското востание. По задушувањето на востанието продолжил да ја обновува револуционерната мрежа во Леринско.
Кон крајот на 1904 година бил предаден во селото Ајтос, Леринско, заробен и однесен во битолскиот затвор. По долги измачувања, османлискиот суд го осудил на смрт.
На денот на погубувањето, околу три илјади битолчани ја следеле поворката од Саат-кулата, покрај Безистенот и реката Драгор, до Ат-пазар.
Според сочуваните сведоштва, пред да биде обесен Турунџев извикал: „Македонија ќе биде слободна!“
Потоа самиот го ставил јажето околу својот врат. Неговата смрт останала запаметена како пример на непокорност и саможртва за слободата на Македонија.
30 август 1944 година – ослободувањето на Виница
На 30 август 1944 година, борците на Четвртата македонска народноослободителна бригада се спуштиле од Плачковица и влегле во Виница.
Окупаторските полициски сили се повлекле кон Кочани, а македонските борци биле пречекани од населението на градскиот плоштад. Виничани го прославувале ослободувањето со песни и ора. Во Народноослободителната борба од Виница учествувале околу 950 борци, од кои 104 ги положиле животите.
30 август 1944 година – Емануел Чучков испратен во НКОЈ
На истиот ден, Емануел Чучков, член на Президиумот на АСНОМ и еден од македонските државотворци, бил испратен како претставник на Македонија во Народниот комитет за ослободување на Југославија.
Во НКОЈ ја извршувал должноста повереник за земјоделство, а во март 1945 година станал министер за Македонија во Привремената сојузна влада. Чучков подоцна дал значаен придонес и во развојот на македонската култура, науката, фолклорот и државните институции.
30 август 1945 година – првиот закон за територијална поделба
На 30 август 1945 година бил донесен првиот Закон за територијална поделба на Федерална Македонија.
Со законот биле утврдени четири окрузи – Скопски, Штипски, Битолски и Велешки – додека Скопје добил статус на посебна административно-територијална целина.
Биле определени и 33 околии со свои народни одбори.
Овој закон бил дел од создавањето и организирањето на институциите на обновената македонска држава по историското Прво заседание на АСНОМ.
