Македонска Нација
ВМРО-ДПМНЕ реагира на прес-конференцијата на СДС, посочувајќи дека токму во времето на владеењето на СДС постоеле сериозни сведоштва за политички влијанија врз обвинителството и судството.
Според партијата, обвинителката Лејла Кадриу од поранешното СЈО јавно сведочела дека Зоран Заев и Радмила Шеќеринска навечер оделе во канцелариите на СЈО и на обвинителите Ленче Ристовска, Гаврил Бубевски, Фатиме Фетаи и Лиле Стефанова им диктирале кои предмети да се работат, кој да биде опфатен, а кој да биде изземен од постапките.
Од ВМРО-ДПМНЕ потсетуваат и на изјавата на поранешниот судија на Врховниот суд, Ристо Катевеновски, кој тврдеше дека бил разрешен откако не дал позитивно мислење во случајот „Мерцедес“, поврзан со Гордана Јанкуловска.
„Во кратки црти, Катевеновски беше разрешен затоа што не постапил по политичка директива“, наведуваат од партијата.
Во реакцијата се споменуваат и поранешната судијка Добрила Кацарска, како и обвинителката Вилма Русковска, за кои ВМРО-ДПМНЕ тврди дека постапувале по насоки на тогашната власт предводена од Заев.
Од партијата прашуваат зошто СДС тогаш молчела, а денес реагира за телефонски разговор помеѓу премиер и државен јавен обвинител.
„Што е криминално ако премиер побара информација за скандалот со ослободување од одговорност за милионски криминал во ТЕЦ Неготино?“, прашуваат од ВМРО-ДПМНЕ.
Во соопштението дополнително се наведува дека СДС директно се вклучува во одбрана на Васко Ковачевски, кој, според нив, бил ослободен од одговорност од обвинителството предводено од Ислам Абази.
