Проектот за брзата пруга започна уште минатата есен, а во текот на оваа година фокусот е ставен на најважниот, но и најмалку видлив дел за јавноста – деталното планирање и подготовка, изјави вечерва вицепремиерот и министер за транспорт Александар Николоски.
Тој посочи дека во моментов се спроведуваат геотехнички истражувања, анализи за влијанието врз животната средина, проценки за влијанието врз населбите низ кои ќе поминува трасата, како и истражувања поврзани со археолошки наоѓалишта.
– Ако не направите добар план, ќе ви се случи Охрид-Кичево. Затоа сега го работиме темелниот дел од проектот. Рокот за подготовка е околу една година, за кога ќе ги видиме првите багери на терен, проектот навистина да може да заврши за пет години. Рокот што првично го дадовме останува – во 2031 година ќе имаме двоколосечна брза пруга од границата со Србија до границата со Грција – изјави Николоски.
Според него, постојната железничка линија од српската до грчката граница е долга 235 километри, додека новата траса, поради поисправената линија, ќе биде пократка и ќе изнесува нешто под 200 километри.
Николоски нагласи дека и соседните земји активно работат на модернизација на железничката инфраструктура. На грчка страна веќе функционира брза пруга од Атина до Солун, а во тек е тендерската постапка за делницата од Солун до македонската граница. Во Србија, пак, веќе е пуштена во употреба брзата пруга Белград–Будимпешта, додека се работи на делницата Белград–Ниш и се бараат средства за продолжување од Ниш до Скопје.
Министерот истакна дека Вардарската долина нема да биде засегната од трасата на брзата пруга и додаде дека идните влади ќе можат да ги реализираат планираните хидроцентрали доколку се покаже дека тоа е економски исплатливо.
Осврнувајќи се на проектот за градски воз во Скопје, Николоски рече дека реализацијата се одвива успешно.
– Јавното претпријатие „Железници инфраструктура“ одлично го работи проектот. Очекувам пругата да биде завршена во текот на јуни, а јули и август ќе се користат за тестирање, со цел градскиот воз да стартува на 1 септември – рече тој.
Тој информираше и дека при крај е изградбата на железничкиот бајпас околу Скопје, кој ќе се протега од Драчево кон Илинден и Миладиновци.
– Овој бајпас ќе биде наменет за карго-сообраќај, со цел товарните локомотиви повеќе да не минуваат низ центарот на Скопје. Ќе забраниме дизел-карго локомотиви заради заштита на животната средина, а ќе можат да сообраќаат само електрични локомотиви. Токму затоа започнавме постапка заедно со Европската банка за обнова и развој за набавка на нови електрични локомотиви – потенцираше министерот Николоски.
