|
|
| Македонска куќа за македонците во Јабука - Панчево |
 Во Јабука кај Панчево, веќе неколку децении заедно со мнозинското српско население сложно живеат припадници на 26 етнички заедници. Денеска на овие простори живее петта генерација на Македонци доселени од сите краеви на Македонија. Резултатите од последниот попис покажуваат дека после српското мнозинско население во панчевачката општина Македонците се на второ место по бројноста - близу 5.300. Најголем број од нив живеат во Јабука 2.054 (32,54 отсто од населението се Македонци). Во Јабука се зборува како во Македонски Брод, Крива Паланка, Охрид, Битола, Струмица.... Јабучани надалеку се познати по манифестацијата „ Тавче Гравче “ која веќе неколку години се одржува на Илинден. Интезивно со години се организираат активности за зачувување на мајчиниот јазик, култура, обичаи, традиции и се што е донесено од родниот крај, од Македонија. Голема улога во тоа има македонското здружението „Јабука“. Големината на здружението е и во тоа што дава посебен придонес и во развојот на мултикултурата. Во прилог на тоа зборува и соработката со Евро-регионалниот центар за развој на друштва во мултикултурална средина „ин медиас рес“ - Панчево и со Ивановчани. На многумина Македонци како што е познато, песната и орото им се во срцата. Меѓу Јабучани голем е бројот на талентирани музичари, почнувајки од самоуките до оние со музичка академија. Нивна се уште неостварена желба е да изградат македонска етно-куќа, каде што ќе можат да се одвиваат бројни активности, но воедно тоа да биде и место за експонати донесени од родната Македонија, а и центар каде што ќе најдат свое место и оние што одамна го напуштиле селото Јабука. За куќата од соништата идејно решение постои, но сеуште не се стекнати финансиски можности. Идејните творци мислат дека до целта може да се дојде со помош на спонзори, преку проектии со работна рака на оние што сакаат да го остварат замисленото. Со други зборови, многумина Јабучани би сакале да станат препознатливи по зачувувањето на етносот и мултикултурата, како што е Ковачица, каде што најголем број од жителите се Словаци. Јабука и денеска има со што да се пофали. Во овоа село се зборува најчесто српски и македонски, но и романски, словачки, ромски, унгарски, меѓу нив голем број се и југоносталгичари. Постои и посебна желба добрите луѓе и домаќини да се спријателат со активисти од дијаспората. За такво нешто домовите на Јабучани широко се отворени. СМК |
