Милан Николов Делчев (1883 -  2. VI 1903) е македонски револуционер, деец на Македонската револуционерна организација, помал брат на Гоце Делчев. Минувајќи со соборец низ коријата на с. Неманци, наишле на османлиска заседа. Во нерамната борба, тој се борел до последниот куршум. Дури по три дена селаните го погребале, а коријата ја нарекле Милан–Делчева Шума.

Жамила Колономос – Цвета (19. VI 1922 - 18. VI 2013) е македонска револуционерка и првоборец, професорка по француска филологија, општественик, писател и публицист од еврејско потекло.

Стефан Гајдов (8. VI 1905 - 18. VI 1992) е македонски композитор, диригент и музички педагог. Тој е еден од петтемината основоположници на современиот музички живот во Република Македонија и еден од најистакнатите автори на учебници за музичките и општообразовните училишта по предметот нотно пеење.

Стојна Димова – Бафчанка (1845 – 10. IX 1927) е македонска револуционерка, деец на Мзкедонската револуционерна организација. Таа станала главен организатор на Организацијата во Прилепско. Во домот на Стојна комитката или уште позната како Мајка Стојна Бафчанка била сместена редакцијата и печатницата на нелегалниот весник „Шило“ и таму се криело оружје, револуционери, војводи и се лекувале болни и ранети четници.

Јордан Грабуловски (12. III 1925 - 26. V 1986) e македонски скулптор, член на МАНУ. Учествувал во НОВ, а по војната завршил Академија за ликовни уметности во Белград. Изработил многубројни споменици, користејќи разновидни стилски определби од реализмот и социјалистичкиот реализам (Ваташа, 1962; Белчишта, 1958; Прилеп, 1958; Кичево, 1963; Скопје, 1965) до асоцијативен геометризам (Отешево, 1973; Гевгелија, 1969; Крушево, 1974).

Димитар Миовски (1. IX 1913 - 25. V 1982) е македонски офталмолог, општественик, професор на Медицинскиот факултет. Бил учесник во НОБ и член на Првото заседание на АСНОМ. По војната вршел бројни општествени функции. Од 1949 година се занимавал со проблемот на кератопластиката и се стекнувал  со богато искуство во повеќе познати офталмолошки центри во Европа. Неговите методи во областа на кератопластиката го прават своевремено еден од врвните светски офталмолози.

Димитар Коштанов (18. III 1879 – 21. V 1915) е македонски револуционер, војвода, гемиџија. Тој бил член на ТМОРО, а подоцна станал член на групата Гемиџии. Учествувал во ископување на подземниот тунел на Отоманската банка во Цариград. По Младотурската револувија во 1908 годона, тој бил еден од основачите на Народната федерална партија (1909 - 1910) во Горна Џумаја.

Никола Вражалски (12. Ⅴ 1914 – 1997) е македонски правник, учесник во НОВ, јавен обвинител на НРМ и пратеник. Тој е организатор на НОО во Кочани во 1944 година и бил член на АСНОМ. Исто така, тој е народен пратеник во Уставотворното собрание на НРМ од Кочанска околија, член на Уставотворниот одбор за поготовка на Уставот на НРМ од 1946 г. и јавен обвинител на НРМ (1946-1948). Потоа бил испратен на Голи Оток како информбировец.

Атанас Атанасов – Божанин  (1921 – 10. V 1975) е македонски партизан, учесник во антифашистичкото движење во Пиринска, Егејска и Вардарска Македонија.  Бил партизан во ЕЛАС, потоа во Петричкиот партизански одред „Антон Попов“, а накрај заменик командант на бригада во НОВ. Учествувал на Првото, Второто и Третото заседание на АСНОМ. Во својот поздравен говор на Второто заседание на АСНОМ ги пренел желбите на македонскиот народ од Пиринскиот дел на Македонија за обединување во една македонска национална држава.

Никола Трајков ( 26. Ⅴ 1888 – 12. Ⅵ 1963) е македонски револуционер, историчар, дипломат. Учествувал во македонското национално-ослободително движење. Го проучувал делото на македонските преродбеници – Браќата Миладиновци, Григор Прличев, Браќата Робевци, К. Мишајков. Голем интерес пројавил кон делото на Крсте Мисирков. Им помагал на младите македонски научници во ориентацијата по бугарските архивски институции.